ហ្កាហ្សា ៖ សំណុំផ្សែងបានសំកាំងលើតំបន់ហ្គាហ្សា ហើយនៅព្រឹកថ្ងៃសុក្រនេះ រថពាសដែកអ៊ីស្រាអែល ត្រូវបានគេមើលឃើញផ្លាស់ទីចេញឆ្ងាយពីតំបន់បិទច្រកមួយនេះ ក្រោយពេលដែលបទឈប់បាញ់រវាងអ៊ីស្រាអែល និងក្រុមហាម៉ាស់ បានចាប់ផ្តើម ។ 

គ្មានសេចក្តីរាយការណ៍នោះទេពីការទម្លាក់គ្រាប់បែក ការវាយប្រហារដោយកាំភ្លើងធំ ឬការវាយប្រហារដោយគ្រាប់រ៉ុក្កែត ពេលដែលអ៊ីស្រាអែល និងក្រុមហាម៉ាស់ ចាប់ផ្តើមបទឈប់បាញ់រយៈពេល ៤ថ្ងៃ នៅក្នុងតំបន់ហ្គាហ្សានាថ្ងៃសុក្រនេះ គឺជាការផ្អាកសង្រ្គាមជាលើកដំបូង នៅក្នុងការប្រយុទ្ធគ្នាអស់រយៈពេល ៤៨ថ្ងៃ ដែលបានធ្វើឲ្យខ្ទេចខ្ទាំតំបន់បិទច្រករបស់ប៉ាឡេស្ទីនមួយនេះ ។ 

បទឈប់បាញ់ បានចាប់ផ្តើមកាលពីវេលាម៉ោង ៧ព្រឹក ថ្ងៃសុក្រ ពាក់ព័ន្ធនឹងបទឈប់បាញ់ទូលំទូលាយនៅតំបន់ភាគខាងជើង និងតំបន់ភាគខាងត្បូងហ្គាហ្សា ការដោះលែងស្រ្តីអ៊ីស្រាអែល ១៣នាក់ និងចំណាប់ថ្នូរកុមារ ដែលត្រូវបានចាប់ដោយក្រុមជីវពលហាម៉ាស់ ក្នុងថ្ងៃនេះ ហើយនិងអនុញ្ញាតឲ្យជំនួយហូរចូលដែនដីឡោមព័ទ្ធហ្គាហ្សា ។ 

ដោយឡែក អ្នកទោសប៉ាឡេស្ទីនយ៉ាងច្រើន ដែលបានជាប់ឃុំនៅក្នុងពន្ធនាគារអ៊ីស្រាអែល នឹងត្រូវដោះលែងផងដែរ ជាការដោះដូរគ្នា ។ 

អ្នកឆ្លើយឆ្លងព័ត៌មានរបស់ទីភ្នាក់ងារព័ត៌មានរ៉យទ័រ នៅជិតតំបន់ភាគខាងជើងហ្គាហ្សា ពុំបានឮសកម្មភាពណាមួយរបស់កងទ័ពអាកាសនៅលើក្បាលនោះទេ ហើយក៏ពុំបានមើលឃើញដានបន្សល់ទុកពីការបាញ់គ្រាប់រ៉ុក្កែតរបស់ក្រុមជីវពលហាម៉ាស់របស់ប៉ាឡេស្ទីននោះដែរ ៕