ទូគី ៖ ប្រភពពីក្រសួងការពារជាតិទួរគី បាននិយាយកាលពីថ្ងៃព្រហស្បតិ៍ថា ប្រទេសទួរគី បានចាប់ផ្តើមកិច្ចពិភាក្សាជាមួយរដ្ឋនានា នៅអឺរ៉ុបអំពីការទិញយន្តហោះចម្បាំង Eurofighter Typhoon ចំនួន ៤០គ្រឿង បន្ទាប់ពីទទួលស្គាល់ថា សំណើរបស់ខ្លួនទិញយន្តហោះចម្បាំងF-16ពីសហរដ្ឋអាមេរិក អាចនឹងមិនដំណើរការ។

រដ្ឋមន្ត្រីក្រសួងការពារជាតិ លោក Yasar Guler បាននិយាយកាលពីសប្តាហ៍មុនថា ប្រទេសទួរគី កំពុងពិភាក្សាជាមួយអង់គ្លេស និងអេស្ប៉ាញ ដើម្បីទិញយន្តហោះចម្បាំង Eurofighter Typhoon ទោះបីជាអាល្លឺម៉ង់ បានជំទាស់នឹងគំនិតនេះក្តី។

ប្រភពដដែល បានបន្តថា ប្រទេសទួរគីចង់ទិញយន្តហោះ Eurofighter ជំនាន់ថ្មីទំនើបបំផុត។ ក្រសួងការពារជាតិរបស់ខ្លួន និងស្ថានទូតអង់គ្លេស នៅទីក្រុងអង់ការ៉ា បាននិយាយថា លោក Guler បានពិភាក្សាបញ្ហានេះជាមួយសមភាគីអង់គ្លេសរបស់លោក Grant Shapps ក្នុងទីក្រុងអង់ការ៉ា កាលពីថ្ងៃព្រហស្បតិ៍។

ប្រទេសទួរគីដែលជាសមាជិកអង្គការណាតូ បានស្នើសុំកាលពីខែតុលា ឆ្នាំ២០២១ ដើម្បីទិញយន្តហោះចម្បាំង Lockheed Martin Corp F-16 ចំនួន៤០គ្រឿង និងឧបករណ៍ទំនើបកម្មចំនួន ៧៩ឈុត សម្រាប់យន្តហោះចម្បាំង ដែលមានស្រាប់របស់ខ្លួន។

រដ្ឋបាលរបស់ប្រធានាធិបតីអាមេរិក ចូ បៃដិន គាំទ្រការលក់តម្លៃ ២០ពាន់លានដុល្លារ ប៉ុន្តែមានការជំទាស់នៅក្នុងសភាអាមេរិកជុំវិញការពន្យារពេលការពង្រីកអង្គការណាតូរបស់ប្រទេសទួរគី ដើម្បីទទួលយក ប្រទេសស៊ុយអែត និងជុំវិញកំណត់ត្រាសិទ្ធិមនុស្សរបស់ខ្លួន។