អេក្វាឌ័រ ៖ ប្រធានាធិបតីទើបចូលកាន់តំណែងថ្មីរបស់ប្រទេសអេក្វាឌ័រ លោក Daniel Noboa បានតែងតាំងគណៈរដ្ឋមន្ត្រីថ្មីរបស់លោក កាលពីថ្ងៃព្រហស្បតិ៍ (ទី២៣ ខែវិច្ឆិកា) បន្ទាប់ពីពិធីស្បថចូលកាន់តំណែងរបស់លោក។

ជម្រើសនៃគណៈរដ្ឋមន្ត្រីរបស់លោក ត្រូវបានកំណត់លក្ខណៈដោយភាពចម្រុះភេទ និងអាយុ ដោយរដ្ឋមន្ត្រីវ័យក្មេងបំផុតរបស់លោក គឺអ្នកនាង Sade Fritschi Naranjo វ័យ ២៦ឆ្នាំ នៅក្នុងក្រសួងបរិស្ថាន។

លោក Noboa ដែលទើបមានវ័យ ៣៥ឆ្នាំ បានឈ្នះការបោះឆ្នោតក្នុងខែតុលា នៅប្រទេសអាមេរិកខាងត្បូងមួយនេះ ដែលកំពុងប្រឈមនឹងបញ្ហាសេដ្ឋកិច្ចយ៉ាងធ្ងន់ធ្ងរ ដោយបានជំរុញឲ្យមនុស្សរាប់ពាន់នាក់ធ្វើចំណាកស្រុក និងបង្កឲ្យមានអំពើហិង្សា ដែលឈានទៅដល់ភាពវឹកវរមិនធ្លាប់មាន រហូតមានការធ្វើឃាតលើបេក្ខជនប្រធានាធិបតី លោក Fernando Villavicencio។

លោក Noboa នឹងកាន់តំណែងជាប្រធានាធិបតីក្នុងរយៈពេលត្រឹមតែ ១៧ខែប៉ុណ្ណោះ ដោយបញ្ចប់អាណត្តិរបស់លោក Guillermo Lasso បន្ទាប់ពីអ្នកកាន់តំណែងមុនរូបនេះ បានអំពាវនាវឲ្យមានការបោះឆ្នោត ដើម្បីចៀសវាងការចោទប្រកាន់ដែលអាចនឹងកើតមាន៕