អ៊ុយក្រែន ៖ ប្រធានាធិបតីអ៊ុយក្រែន លោក Volodymyr Zelenskyy បានប្រកាសថា អ៊ុយក្រែននឹងបណ្តេញរុស្ស៊ីចេញពីជើងមេឃរបស់ខ្លួននៅឆ្នាំ ២០២៤។ ចាប់តាំងពីឆ្នាំ ២០២២ អ៊ុយក្រែនរំដោះបានទឹកដីជាងពាក់កណ្តាលដែលចូលកាន់កាប់ដោយរុស្ស៊ី។ នៅឆ្នាំ ២០២៣ អ៊ុយក្រែនបានបណ្តេញកងទ័ពជើងទឹករុស្ស៊ីចេញពីសមុទ្រខ្មៅភាគច្រើន ហើយនៅឆ្នាំ២០២៤ អ៊ុយក្រែន មានបំណងបោសសម្អាតរុស្ស៊ីចេញពីជើងមេឃរបស់ខ្លួន។ លោក Zelenskyy បាននិយាយនៅលើបណ្តាញ X (Twitter) ថា ការពង្រឹងវិស័យការការពារដែនអាកាសរបស់អ៊ុយក្រែន គឺជាការវិនិយោគជាយុទ្ធសាស្រ្តល្អបំផុតនៅក្នុងសន្តិសុខសម្រាប់ហេតុផលយ៉ាងហោចណាស់ចំនួន៥។ លោកបានសរសេរថា ទី១ រាល់ប្រព័ន្ធនិងមីស៊ីល ដែលផ្តល់ឱ្យអ៊ុយក្រែនជួយសង្គ្រោះជីវិតមនុស្ស។ ទីពីរ គ្រប់តំបន់ និងទីក្រុងធំៗគ្របដណ្តប់ពេញលេញដោយខែលការពារដែនអាកាសអាចទុកចិត្តបាន មានន័យថា មនុស្សកាន់តែច្រើន រហូតដល់រាប់លាននាក់ អាចវិលត្រឡប់មកពីបរទេសវិញបាន ដែលនេះនឹងជំរុញសេដ្ឋកិច្ចរបស់អ៊ុយក្រែន អនុញ្ញាតឱ្យយើងកាត់បន្ថយគម្លាតថវិកា និងកាត់បន្ថយការពឹងផ្អែករបស់យើងលើជំនួយហិរញ្ញវត្ថុអន្តរជាតិ។ 

ទីបី ការការពារដែនអាកាសរបស់យើងកាន់តែរឹងមាំ ភាពជោគជ័យរបស់អ៊ុយក្រែនកាន់តែធំធេងនៅសមុទ្រខ្មៅ ការនាំចេញតាមសមុទ្រកាន់តែច្រើន។ ទីបួន ប្រព័ន្ធការពារដែនអាកាស និងមីស៊ីលបន្ថែមនីមួយៗ ជួយសង្គ្រោះធនធានដែលនឹងត្រូវការយកមកវិញនូវរបស់របរដែលត្រូវបានបំផ្លាញ ហេដ្ឋារចនាសម្ព័ន្ធសំខាន់ៗ ប្រព័ន្ធថាមពល បណ្តាញថាមពល និងអ្វីៗផ្សេងទៀត។

ទីប្រាំ បដិសេធនូវសមត្ថភាពរបស់រុស្ស៊ីក្នុងការធ្វើឲ្យអ៊ុយក្រែនភ័យខ្លាច ដោយមីស៊ីលនិងយានដ្រូននឹងបង្ខំឱ្យអ្នកឈ្លានពានបោះបង់យុទ្ធសាស្ត្រ ដែលនឹងជួយដល់កិច្ចខិតខំប្រឹងប្រែងទាំងអស់ដើម្បីនាំមកនូវជ័យជម្នះកាន់តែខិតជិត។