បម្រែបម្រួលអាកាសធាតុ កំពុងធ្វើឲ្យរដូវរងាជួបការលំបាកកើនឡើងសម្រាប់ឲ្យរមណីយដ្ឋានជិះស្គីរៀបចំកន្លែងជិះស្គី ប៉ុន្តែដើម្បីប្រយុទ្ធប្រឆាំងនឹងអាកាសធាតុដែលពុំអាចព្យាករណ៍បាននេះ រមណីយដ្ឋានតំបន់ខ្ពង់រាប Leutasch ឬ Seefeld ស្ថិតនៅខេត្ត Tyrol របស់ប្រទេសអូទ្រីស បានប្រើប្រាស់កសិដ្ឋានព្រិលជាដំណោះស្រាយ ។ 

ព្រិលត្រូវបានស្តុកទុកអំឡុងរដូវក្តៅនៅក្រោមគម្រប ហើយគេអាចរៀបចំវាធ្វើជាផ្លូវជិះស្គីប្រណាំងរយៈពេលជាច្រើនឆ្នាំ ពេលដែលការធ្លាក់ព្រិលយឺតយ៉ាវ ឬមួយពេលដែលត្រូវការវា ។ 

ផ្លូវព្រិលជិះស្គីប្រណាំងនៅរមណីយដ្ឋាន Leutasch មានចម្ងាយជិត ២គ.ម ហើយបើទោះបីជាសីតុណ្ហភាពពុំសូវត្រជាក់ខ្លាំង ហើយនៅមានព្រៃឈើពណ៌បៃតងយ៉ាងណាក្តី ក្រុមអ្នកជិះស្គីប្រណាំង អាចដំឡើងសាច់ដុំរបស់ពួកគេបាន ចាប់ពីថ្ងៃទី ១៧ ខែវិច្ឆិកាតទៅ ។ 

រមណីយដ្ឋាន Leutasch បានប្រើប្រាស់បច្ចេកទេសនេះ ចាប់តាំងពីឆ្នាំ ២០១៥មកម្ល៉េះ ក្នុងនោះព្រិលប្រហែល ១ម៉ឺនម៉ែត្រគូប បានស្តុកនៅក្រោមគម្របអំឡុងពេលរដូវក្តៅ ។ 

គេត្រូវការពេល ៤ថ្ងៃដើម្បីរៀបចំផ្លូវព្រិល ហើយវាសំខាន់ខ្លាំងណាស់កាលដែលផ្លូវព្រិលមានចម្ងាយជិត ដែលនេះមានន័យថា គំនរព្រិលអាចស្តុកបាន ត្រូវតែនៅជិតផ្លូវព្រិលជិះស្គី ៕