កាលពីថ្ងៃព្រហស្បតិ៍ម្សិលមិញ អគ្គលេខាធិការអង្គការសហប្រជាជាតិ(UN)លោក Antonio Guterres បានបំពេញទស្សនកិច្ចទៅកាន់តំបន់អង់តាក់ទិក អមដំណើរដោយប្រធានាធិបតីឈីលីលោក Gabriel Boric ដើម្បីលើកកម្ពស់ការយល់ដឹងពីបម្រែបម្រួលអាកាសធាតុ ។ 

ប្រមុខដឹកនាំទាំង ២ បានធ្វើដំណើរមកដល់មូលដ្ឋានទ័ពអាកាស Presidente Eduardo Frei Montalva របស់ឈីលី ហើយនិងចាប់ផ្តើមមើលផ្ទាំងទឹកកក Collins និង Nelson ។ ពួកគេបានឈប់មើលសត្វផេនឃ្វីន និងពពួកសត្វស្រុកដទៃទៀតផងដែរនៅលើកោះ Kopaitic ។ 

យោងតាមការអះអាងរបស់ U.N បានឲ្យដឹងថា លោក Guterres នឹងនិយាយពីបទពិសោធន៍របស់លោកមួយនេះ អំឡុងកិច្ចប្រជុំកំពូលអាកាសធាតុអង្គការសហប្រជាជាតិ COP28 នៅក្នុងទីក្រុង Dubai របស់ប្រទេសអារ៉ាប់រួម នៅសប្តាហ៍ក្រោយនេះ ជាកន្លែងដែលលោកនឹងអំពាវនាវឲ្យមានវិធានការទប់ស្កាត់វិបត្តិដែលពួកយើងកំពុងប្រឈម ។ 

សូមបញ្ជាក់ថា ក្រុមមេដឹកនាំពិភពលោក នឹងចូលរួមកិច្ចប្រជុំប្រចាំឆ្នាំមួយនេះ ដោយមានគោលដៅរក្សាគោលដៅឡើងសីតុណ្ហភាព ១,៥អង្សាសេដែលមាននៅក្នុងកិច្ចព្រមព្រៀងក្រុងប៉ារីស ៕