វិមានក្រឹមឡាំង នៅថ្ងៃសុក្រ (ទី២៤ ខែវិច្ឆិកា) នេះ បាននិយាយថា បំណងប្រាថ្នារបស់អង្គកាណាតូ (NATO) ដែលចង់មានអាណាឡូកយោធានៃតំបន់ Schengen នៅអឺរ៉ុប ដើម្បីអនុញ្ញាតឲ្យកងកម្លាំងប្រដាប់អាវុធរបស់សម្ព័ន្ធមិត្តផ្លាស់ទីដោយសេរី ដើម្បីទប់ទល់នឹងរុស្ស៊ីនោះ បានធ្វើឲ្យភាពតានតឹងកើនឡើង ហើយជាមូលហេតុ ដែលនាំឲ្យមានការព្រួយបារម្ភ។

មេបញ្ជាការភស្តុភាររបស់អង្គការណាតូ JSEC លោកឧត្តមសេនីយ៍ឯក Alexander Sollfrank បានប្រាប់សារព័ត៌មាន Reuters ក្នុងបទសម្ភាសន៍មួយ ដែលបានចេញផ្សាយ កាលពីថ្ងៃព្រហស្បតិ៍ (ទី២៣ ខែវិច្ឆិកា) ថា លោកចង់ឃើញមានតំបន់បែបនេះ។ លោកបាននិយាយថា លោកមានការព្រួយបារម្ភថា ការិយាធិបតេយ្យច្រើនពេក នៅទូទាំងទ្វីបអឺរ៉ុប កំពុងរារាំងដល់ការផ្លាស់ទីរបស់កងទ័ព ជាបញ្ហាដែលលោកបាននិយាយថា អាចបណ្តាលឲ្យមានការពន្យារពេលយ៉ាងយូរ ប្រសិនបើជម្លោះជាមួយរុស្ស៊ី នឹងផ្ទុះឡើង។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ទីក្រុងម៉ូស្គូនឹងឆ្លើយតប ប្រសិនបើសំណើឲ្យតំបន់យោធា Schengen ក្លាយជាការពិត។

លោកបាននិយាយថា ការពិភាក្សាអំពីការបង្កើតតំបន់យោធា Schengen បានបង្ហាញជាថ្មីម្តងទៀតថា អឺរ៉ុបមិនមានឆន្ទៈក្នុងការស្តាប់ការព្រួយបារម្ភស្របច្បាប់របស់ទីក្រុងម៉ូស្គូ និងបានត្រៀមខ្លួនរួចជាស្រេចក្នុងការពង្រឹងសន្តិសុខផ្ទាល់ខ្លួន ដោយការចំណាយរបស់រុស្ស៊ី៕