កាលពីថ្ងៃសុក្រ ប្រជាជនអ៊ីស្រាអែលមានទឹកមុខរីករាយមួយក្រុម បានមកស្វាគមន៍ កុមារ និងស្ត្រីដែលត្រូវបានចាប់ធ្វើជាចំណាប់ថ្នូរដោយក្រុមសកម្មប្រយុទ្ធអ៊ីស្លាមនិយមហាម៉ាសនៅហ្កាហ្សាអស់រយៈពេល ៤៩ ថ្ងៃ ខណៈពួកគេត្រូវបានដឹកតាមឧទ្ធម្ភាគចក្រមកកាន់មន្ទីរពេទ្យ។
មនុស្សមួយចំនួន មានកាន់ទង់ជាតិអ៊ីស្រាអែល ដែលប្រជាជនបានមកអបអរក្នុងពេលឧទ្ធម្ភាគចក្រចុះចត នៅមជ្ឈមណ្ឌលវេជ្ជសាស្ត្រកុមារ Schneider នៅអ៊ីស្រាអែលភាគកណ្តាល ដោយបានដឹកចំណាប់ថ្នូរ ១៣ នាក់ក្នុងចំណោមចំណាប់ថ្នូរដែលត្រូវបានដោះលែង២៤នាក់។ យោធាបាននិយាយថា ចំណាប់ថ្នូរដែលត្រូវបានដោះលែងបានឆ្លងកាត់ការពិនិត្យសុខភាពដំបូងរួចហើយនៅក្នុងប្រទេសអ៊ីស្រាអែល ហើយនឹងត្រូវបាននាំទៅជួបជុំជាមួយក្រុមគ្រួសាររបស់ពួកគេនៅមន្ទីរពេទ្យ។
ការដោះលែងចំណាប់ថ្នូរក្រុមដំបូង ត្រូវបានធ្វើឡើងក្រោមកិច្ចព្រមព្រៀងបទឈប់បាញ់រយៈពេលបួនថ្ងៃរវាងអ៊ីស្រាអែល និងក្រុមហាម៉ាស។ ការដោះដូរចំណាប់ថ្នូរបន្ថែមទៀត សម្រាប់អ្នកជាប់ឃុំ ប៉ាឡេស្ទីននឹងត្រូវធ្វើឡើង។
ជនជាតិអ៊ីស្រាអែលក្រុមទីមួយ ដែលត្រូវបានដោះលែងពីការចាប់ជាចំណាប់ថ្នូរនៅតំបន់ហ្កាហ្សា បានវិលត្រឡប់ទៅប្រទេសអ៊ីស្រាអែលវិញកាលពីថ្ងៃសុក្រ ជាថ្ងៃដំបូងនៃបទឈប់បាញ់មានរយៈពេល ៤ថ្ងៃ នៃផែនការ ក្នុងអំឡុងពេលដែលការដោះដូរចំណាប់ថ្នូរបន្ថែមទៀត សម្រាប់អ្នកជាប់ឃុំប៉ាឡេស្ទីននឹងត្រូវធ្វើឡើងក្នុងរយៈពេលបទឈប់បាញ់៤ថ្ងៃនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
