ជាលើកដំបូងក្នុងរយៈពេលជាងមួយខែមកនេះ ដែលការបាញ់គ្រាប់រ៉ុក្កែតរបស់ប៉ាឡេស្ទីន និង​ការ​វាយ​ប្រហារតាមអាកាសរបស់អ៊ីស្រាអែលបានស្ងប់ស្ងាត់នៅជុំវិញតំបន់ហ្កាហ្សា ក្នុងពេលចាប់​ផ្តើម​បទ​ឈប់​បាញ់​បណ្តោះអាសន្នកាលពីថ្ងៃសុក្រ។ ខណៈបទឈប់បាញ់បណ្តោះអាសន្ន រវាង​កង​កម្លាំង​អ៊ីស្រាអែល និងក្រុមសកម្មប្រយុទ្ធប៉ាឡេស្ទីន បានចូលជាធរមាន ពលរដ្ឋ​តំបន់​ហ្កាហ្សា​រាប់​សែន​នាក់​ដែលបានភៀសខ្លួនចេញពីការប្រយុទ្ធគ្នា បានសម្រេច​ចិត្ត​សាកល្បង​វិល​ត្រឡប់​ទៅ​លំ​នៅ​ឋាន​របស់ពួកគេវិញ។ នៅក្នុងទីក្រុង Khan Younis ភាគខាងត្បូង ជាលំនៅ​ឋាន​គ្រួសារ​រាប់​ពាន់​ដែល​បានភៀសខ្លួនចេញ រួមទាំងមកពី​ភាគ​ខាង​ជើង​តំបន់​ហ្កាហ្សា​ដែល​ត្រូវ​បាន​ទម្លាក់​គ្រាប់​បែក មនុស្សជាច្រើនកំពុងធ្វើដំណើរនៅតាមដងផ្លូវនានាត្រឡប់ទៅលំនៅឋានវិញ។ លោក Ahmed Wael បានប្រាប់សារព័ត៌មានរ៉យទ័រថា លោកមានអារម្មណ៍សប្បាយរីករាយ និង​ធូស្រាល​ក្នុងចិត្ត។ លោកនិយាយថា លោកកំពុងត្រលប់ទៅលំនៅឋានវិញ ចិត្តយើងបានធូស្រាល ជា​ពិសេសមានបទឈប់បាញ់ជាផ្លូវការរយៈពេលបួនថ្ងៃ វាប្រសើរជាងត្រឡប់ទៅរស់នៅក្នុងតង់។ លោក​ពិតជាធុញទ្រាន់ក្នុងការអង្គុយនៅទីនោះ ដោយគ្មានអាហារ ឬទឹក។ នៅទីនោះ នៅ​លំ​នៅ​ឋាន យើងអាចរស់នៅបាន យើងផឹកតែ ធ្វើនំប៉័ងដោយដុតភ្លើង និងឡ។

អង្គការ​សហប្រជាជាតិនិយាយថា ប្រហែល ២ ភាគ ៣ នៃពលរដ្ឋ ២,៣ លាននាក់​នៅ​តំបន់​ហ្កាហ្សា គ្មានផ្ទះសម្បែងនោះទេ ហើយពាក់​កណ្តាល​នៅ​ភាគ​ខាង​ជើង​ទាំង​អស់​នៅ​តំបន់​ហ៊ុម​ព័ទ្ធ​នោះ​ បានកាត់បន្ថយទៅជាវាលរហោស្ថានដោយសារការវាយលុករបស់អ៊ីស្រាអែល។ អ៊ីស្រាអែល បាន​វាយលុកតំបន់ហ្កាហ្សា នៅក្នុងប្រតិបត្តិការមួយ ដែលខ្លួននិយាយថា មានគោល​បំណង​កម្ទេច​ចលនា​អ៊ីស្លាមនិយមហាម៉ាស់ ដែលគ្រប់គ្រងនៅតំបន់ហ្កាហ្សា បន្ទាប់ពីក្រុម​អ្នក​ប្រយុទ្ធ​ហាម៉ាស់ បានបើកការវាយប្រហារដ៏ភ្ញាក់ផ្អើលមួយ ទៅលើសហគមន៍អ៊ីស្រាអែល បណ្តាល​ឲ្យ​មនុស្ស ១.២០០ នាក់ស្លាប់ និងចាប់ចំណាប់ថ្នូររាប់រយនាក់៕