ប្រធានាធិបតី លោក Joe Biden បានកោតសរសើរដល់ផ្នែកការទូតរបស់សហរដ្ឋអាមេរិក នៅ​ពី​ក្រោយ​ការ​ដោះលែងចំណាប់ថ្នូរចំនួន២៤នាក់ កាលពីថ្ងៃសុក្រ ទី ២៤ ខែវិច្ឆិកា ដោយបាន​និយាយ​ថា វាគឺជាការចាប់ផ្តើម នៃអ្វីដែលលោករំពឹងថា នឹង​មាន​ការ​ដោះលែង​ចំណាប់​ថ្នូរ​បន្ថែម​ទៀត​ដោយ​ក្រុមសកម្មប្រយុទ្ធប៉ាឡេស្ទីន ក្នុងរយៈពេលប៉ុន្មានថ្ងៃខាងមុខនេះ។

ក្នុង​អំឡុងពេលសន្និសីទសារព័ត៌មាន លោក Biden បាន​បដិសេធ​មិន​ធ្វើ​ការ​សន្និដ្ឋាន​អំពី​ថា​តើ​រយៈ​ពេល​យូរប៉ុណ្ណាដែលសង្រ្គាមអ៊ីស្រាអែល និងក្រុមហាម៉ាស់នឹងបន្ត ប៉ុន្តែបាននិយាយថា លោក​គិតថាឱកាសនៃការបន្ថែមពេលបទឈប់បាញ់ដែលកំពុងបន្តគឺ «ប្រាកដជាមាន» ។ លោកក៏បានបង្ហាញក្តីសង្ឃឹមថា ជនជាតិអាមេរិក ដែលក្រុម​ហាម៉ាស​ចាប់​ខ្លួន​ក៏​នឹង​ត្រូវ​បាន​ដោះ​លែង​ផង​ដែរ។

លោកប្រធានាធិបតី បាននិយាយថា លោកជឿជាក់​លើ​ក្រុម​ហាម៉ាស​ក្នុង​ការ​ឆ្លើយ​តប​ទៅ​នឹង​សម្ពាធ។ អ្នកប្រយុទ្ធក្រុមហាម៉ាស់ បានដោះលែងចំណាប់ខ្មាំង ២៤ នាក់ កាលពីថ្ងៃ​សុក្រ​ក្នុង​អំឡុង​ថ្ងៃ​ដំបូងនៃបទឈប់បាញ់ក្នុងសង្រ្គាម ដែលរួមមានស្ត្រីនិងកុមារអ៊ីស្រាអែល១៣នាក់ កម្មករ​កសិដ្ឋានជនជាតិថៃ ១០ នាក់​ និង​ជន​ជាតិ​ហ្វីលីពីន​ម្នាក់​បន្ទាប់​ពី​ស្នូរ​កាំភ្លើង​បាន​ស្ងប់​ស្ងាត់​នៅ​ទូទាំង​តំបន់​ហ្កាហ្សាជាលើកដំបូងក្នុងរយៈពេល ៧ សប្តាហ៍មកនេះ។

គណៈកម្មាធិការកាកបាទក្រហមអន្តរជាតិ (ICRC) បាននិយាយថា ចំណាប់​ខ្មាំង​ត្រូវ​បាន​ផ្ទេរ​ចេញ​ពី​តំបន់ហ្កាហ្សា ហើយប្រគល់ទៅឱ្យអាជ្ញាធរអេហ្ស៊ីប នៅច្រកឆ្លងកាត់ព្រំដែន Rafah អម​ដោយ​បុគ្គលិកគណៈកម្មាធិការកាកបាទក្រហមអន្តរជាតិ(ICRC) ៨នាក់នៅក្នុងក្បួនរថយន្តចំនួន ៤ គ្រឿង៕