តាមការកំណត់នៅថ្ងៃទី២៦ ២៧ និង២៨ ខែវិច្ឆិកា ឆ្នាំ២០២៣នេះ កម្ពុជាត្រូវរៀបចំព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រខែ។ ទន្ទឹមនេះ បានមើលឃើញថា ប្រជាពលរដ្ឋយ៉ាងច្រើនកុះករមកពីតំបន់ផ្សេងៗក្នុងរាជធានី ខេត្ត បានមកដើរលេងកម្សាន្តតាមមាត់ទន្លេ រហូតដល់មុខព្រះបរមរាជវាំង ប្រកបដោយភាពសប្បាយរីករាយ។
កំពុងដើរទស្សនានៅមាត់ទន្លេ និងមើលការហាត់សមរបស់ក្រុមកីឡាករទូក លោក គង់ ស៊ា វ័យជាង ៧០ឆ្នាំ មកពីខេត្តព្រៃវែង បាននិយាយប្រាប់ទូរទស្សន៍ព័ត៌មាន ប៊ីធីវី ថា រូបលោក និងក្រុមគ្រួសារទើបមកដល់ភ្នំពេញនៅថ្ងៃទី២៥ ខែវិច្ឆិកានេះ និងមានបំណងស្នាក់នៅរហូតដល់ចប់កម្មវិធីបុណ្យ ដើម្បីដើរលេងកម្សាន្ត និងទស្សនាគ្រប់កម្មវិធីទាំងអស់ ដែលរាជរដ្ឋាភិបាលបានសម្រេចរៀបចំពិធីបុណ្យអុំទូកនេះឡើងវិញ បន្ទាប់ពីអាក់ខានមួយរយៈដោយសារវិបត្តិសាកល។
ដោយឡែក ប្រជាពលរដ្ឋមកពីតំបន់ជ្រោយចង្វារ កញ្ញា ម៉ុ យូម៉ី បានឲ្យ ប៊ីធីវី ដឹងដែរថា នៅពេលមកដល់កន្លែងត្រៀមរៀបចំពិធីទាំងមូលនៅមុខព្រះបរមរាជវាំងនេះ កញ្ញាពិតជាមានអារម្មណ៍រំភើប និងសប្បាយរីករាយណាស់ ព្រោះឃើញការរៀបចំពិធីនេះបានឡើងវិញ។ ជាពិសេស ឃើញអាជ្ញាធររៀបចំសន្តិសុខសណ្តាប់ធ្នាប់បានយ៉ាងល្អ និងសម្រួលចរាចរណ៍តាមដងផ្លូវ ដើម្បីរក្សាសន្តិសុខសុវត្ថិភាពជូនប្រជាពលរដ្ឋមកលេងកម្សាន្តឱ្យមានភាពកក់ក្តៅ និងសប្បាយរីករាយ។
ប្រជាពលរដ្ឋទាំងនេះ បានបង្ហាញការជឿជាក់ និងកក់ក្តៅចំពោះរាជរដ្ឋាភិបាល ក៏ដូចជាអាជ្ញាធរពាក់ព័ន្ធថានឹងរក្សាបាននូវសុខសុវត្ថិភាពក្នុងព្រះរាជពិធីបុណ្យអុំទូកនេះសម្រាប់អ្នកដើរលេងកម្សាន្ត។ ពួកគាត់ ក៏បានអំពាវនាវឲ្យប្រជាពលរដ្ឋដែលបានចូលរួមដើរលេងកម្សាន្តទាំងអស់ សូមរក្សាសេចក្តីថ្លៃថ្នូវ និងសណ្តាប់ធ្នាប់ឲ្យបានល្អក្នុងពេលដើរកម្សាន្ត ជាពិសេសការរៀបចំទុកដាក់សំរាមឲ្យបានត្រឹមត្រូវ ដើម្បីបរិស្ថានស្អាតទាំងអស់គ្នា៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
