ស្ថានទូតអាមេរិកប្រចាំប្រទេសលីបង់ កាលពីថ្ងៃសុក្រ បាននិយាយថា មាន​ភាព​ស្ងប់​ស្ងាត់​រយៈ​ពេល ១២ម៉ោងនៅតាមខ្សែបន្ទាត់ពណ៌ខៀវ (Blue Line)ដែលកំណត់ព្រំដែនជាមួយអ៊ីស្រាអែល ជា​កន្លែងដែលការបាញ់ប្រហារប្រចាំថ្ងៃ បាននិងកំពុងកើតឡើងរវាងក្រុមប្រដាប់អាវុធហេបូឡា និង​អ៊ីស្រាអែល។

ស្ថានទូតនេះ បាននិយាយនៅលើបណ្តាញសង្គមXថា៖«ភាពស្ងប់ស្ងាត់រយៈពេល ១២ម៉ោង នៅ​លើ​ខ្សែ​បន្ទាត់ពណ៌ខៀវ បានផ្តល់ឲ្យយើងនូវក្តីសង្ឃឹម និងថាមពលជាថ្មី ដើម្បីកសាង​ថ្ងៃ​ស្អែក​ឲ្យ​កាន់តែ​ប្រសើរឡើងសម្រាប់ប្រទេសលីបង់»។

ក្រុមអ្នកស្រុក បានប្រាប់សារព័ត៌មានរ៉យទ័រថា ព្រំដែន បានស្ងប់ស្ងាត់ តាំងពីមុនម៉ោង ០៧០០ ម៉ោង​ក្នុងស្រុក នៅព្រឹកថ្ងៃសុក្រ ប៉ុន្តែមានការសំឡេងបាញ់ប្រហារតិចតួចចេញខាងអ៊ីស្រាអែល។

ភាព​ស្ងប់ស្ងាត់នេះ បានកើតឡើងបន្ទាប់ពីមានបទឈប់បាញ់បណ្ដោះអាសន្ន ដែល​សម្រប​សម្រួល​ដោយ​កាតារវាងអ៊ីស្រាអែល និងក្រុមហាម៉ាស ដែលជាសម្ព័ន្ធមិត្តរបស់ក្រុមហេសបូឡា នៅ​តំបន់ហ្កាហ្សា៕