ថ្មីៗនេះអ្នកភូមិត្រពាំងឫស្សី ឃុំដំណាក់សុក្រំ ស្រុកដងទង់ ខេត្តកំពតម្នាក់ បាន​ឆ្លង​ជំងឺ​ផ្តាសាយបក្សី ហើយដើម្បីបង្ការ ទប់ស្កាត់ការឆ្លងរីករាលដាល មន្ត្រីជំនាញ​បាន​ប្រាប់​ប្រជាពលរដ្ឋ​ក្នុងភូមិទាំងអស់ សូមកុំលក់ដូរ ឬទទួលទានសាច់បក្សី ឬមាន់ទាងាប់ ខណៈ​ដែល​សត្វ​មាន់​ទាសង្ស័យមានជំងឺជិតចំនួន១០០ក្បាលត្រូវបានសម្លាប់ រួចជីកកប់ចោល ។

ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្មខេត្តកំពត លោក ម៉េង សន្តិភាព បាន​ប្រាប់​ឱ្យដឹងថា ក្រោយទទួលព័ត៌មានពីមន្ត្រីមូលដ្ឋានស្តីពីហេតុការណ៍មាន់ទាឈឺងាប់ និង​សេចក្តី​ប្រកាសព័ត៌មានរបស់ក្រសួងសុខាភិបាល នូវករណីពលរដ្ឋរស់នៅភូមិត្រពាំងឫស្សី ឃុំ​ដំណាក់​សុក្រំ ស្រុកដងទង់ឆ្លងមេរោគផ្តាសាយបក្សីមក នាពីព្រឹកថ្ងៃទី២៤ ខែវិច្ឆិកា លោក​បាន​ដឹក​នាំ​មន្ត្រីក្រោមឱវាទចុះដល់គោលដៅភ្លាមៗ ដោយសហការ​ជាមួយ​អាជ្ញាធរ​មូលដ្ឋាន​បាន​អប់រំ​ណែនាំ និងផ្សព្វផ្សាយដល់ប្រជាពលរដ្ឋ ព្រមទាំង​បាញ់​ថ្នាំ​សម្លាប់​មេរោគ​ ដើម្បី​បង្ការ​ទប់​ស្កាត់​ការ​ឆ្លង​រាល​ដាលជំងឺនេះ។ លោកប្រធានការិយាល័យបានបន្តថា ក្រុមជំនាញ​ក៏​បាន​សម្លាប់​សត្វ​មាន់​ទា​មាន​ជំងឺចំនួន​៩១ក្បាល រួចជីកកប់យ៉ាងប្រយ័ត្នបំផុត។

ម្តាយមីងស្ត្រីឆ្លងជំងឺផ្តាសាយបក្សី អ្នកស្រី បោ មាន់ បានប្រាប់ឱ្យដឹងថា ប្រហែល១សប្តាហ៍មុន ក្នុង​ភូមិ​ត្រពាំងឫស្សី ឃុំដំណាក់សុក្រំ មានសត្វមាន់ទាចាប់ផ្តើមឈឺ និងងាប់​ជា​បន្ត​បន្ទាប់​ស្ទើរ​អស់​ពី​ទ្រុង។ ជាមួយគ្នានោះ ក្មួយរបស់អ្នកស្រីបានយកមាន់ងាប់ទៅធ្វើម្ហូប រួចមានអាការៈ​មិន​ស្រួល​ខ្លួន ក៏បានទៅទិញថ្នាំលេប។ ដោយសារស្ថានភាពមិនបានធូរស្បើយ គាត់ក៏ណែនាំ​ឱ្យ​ទៅ​ជួប​​គ្រូ​ពេទ្យស្រុកឈូកពិនិត្យ ហើយត្រូវបានបញ្ជូនបន្តទៅភ្នំពេញតែម្តង ហើយលទ្ធផល​តេស្ត​បង្ហាញ​ថា នាងមានជំងឺផ្តាសាយបក្សី។

លោក ហេង ចាន់ថា ប្រធានការរិយាល័យបច្ចេកទេស នៃមន្ទីរសុខាភិបាលខេត្ត បាន​ប្រាប់​ឲ្យ​ដឹង​ថា ក្រុមការងារក្រសួង មន្ទីរ ជំនាញពាក់ព័ន្ធ បានចុះធ្វើការស្រាវជ្រាវយកសំណាក និង​ដាម​ដាន​ស្ថាន​ភាព​អ្នកដែលប៉ះពាលផ្ទាល់ជាមួយអ្នកជំងឺ(សមាជិកក្នុងគ្រួសារ៣នាក់ ) ប៉ុន្តែមិនមាន​រោគ​សញ្ញា​អ្វី​គួរ​ឲ្យកត់សំគាល់ទេ ហើយក្រុមកាងារ នឹងបន្តតាមដានការវិវត្តផ្សេងៗនៅថ្ងៃស្អែកទៀត៕ អត្ថបទៈ អន សារឹម