ក្រសួងការពារជាតិអាល្លឺម៉ង់ បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា ប្រទេសអាល្លឺម៉ង់ នឹងផ្តល់ឲ្យអ៊ុយក្រែននូវប្រព័ន្ធការពារដែនអាកាសរយៈចម្ងាយមធ្យម IRIS-T SLM ចំនួន៤ បន្ថែមទៀត ដែលជាផ្នែកនៃកញ្ចប់ជំនួយយោធាដែលមានតម្លៃជាង១,៣ ពាន់លានអឺរ៉ូ (១,៤ពាន់លានដុល្លារ) ។ ប្រព័ន្ធនេះ នឹងត្រូវបានផ្គត់ផ្គង់ ចាប់ពីឆ្នាំ ២០២៥។

ក្រសួង បាននិយាយថា កញ្ចប់នេះ ក៏រួមបញ្ចូលទាំងយានដ្រូន និងប្រព័ន្ធការពារយានដ្រូន ឧបករណ៍ដោះមីន ប្រព័ន្ធទំនាក់ទំនងផ្កាយរណប ឧបករណ៍សង្គ្រាមអេឡិចត្រូនិច គ្រាប់មីនប្រឆាំងរថក្រោះកំណត់គោលដៅ និងគ្រាប់កាំភ្លើងធំ ដែលមានបំណងដោះស្រាយតម្រូវការចំបាច់ខ្លាំងរបស់កងកម្លាំងប្រដាប់អាវុធអ៊ុយក្រែន។

ប្រទេសអាល្លឺម៉ង់ បានក្លាយជាអ្នកផ្គត់ផ្គង់ជំនួយយោធាដ៏ធំបំផុតដល់អ៊ុយក្រែន បន្ទាប់ពីសហរដ្ឋអាមេរិក ក្រោយពីមានការស្ទាក់ស្ទើរដំបូងក្នុងការផ្តល់អាវុធ។ រដ្ឋមន្ត្រីការពារជាតិអាល្លឺម៉ង់លោក Boris Pistorius នៅដើមខែនេះ បានបញ្ជាក់ពីផែនការជំរុញការគាំទ្រយោធារបស់ប្រទេសសម្រាប់អ៊ុយក្រែន ជាការឆ្លើយតបទៅនឹងរបាយការណ៍ប្រព័ន្ធផ្សព្វផ្សាយ រដ្ឋាភិបាល កំពុងស្វែងរកជំនួយទ្វេដងដល់ ៨ពាន់លានអឺរ៉ូ ក្នុងឆ្នាំ ២០២៤។

ក្រសួងបាននិយាយថា ប្រព័ន្ធ IRIS-T និងរ៉ាដាតាមដាន Patriot ទីពីរ ដែលបានប្រគល់នៅក្នុងខែតុលា នឹងទៅដល់អ៊ុយក្រែននៅឆ្នាំនេះ នៅពេលដែលបុគ្គលិកអ៊ុយក្រែន បានបញ្ចប់ការបណ្តុះបណ្តាលរបស់ពួកគេ។

ក្រសួងបានឲ្យដឹងទៀតថា លោក Pistorius បានប្រកាសពីការគាំទ្រ កាលពីថ្ងៃទី ២២ ខែវិច្ឆិកា នៅក្នុងសន្និសីទតាមវីដេអូ ជាមួយក្រុមទំនាក់ទំនងការពារជាតិអ៊ុយក្រែន ដែលជាកិច្ចប្រជុំលើកទី១៧ ត្រូវបានរៀបចំឡើងនៅក្នុងអ្វីដែលគេហៅថា មូលដ្ឋានទ័ពអាកាស Ramstein ហើយបាននិយាយថា អាល្លឺម៉ង់ នឹងឈរជាមួយអ៊ុយក្រែន «ឥឡូវនេះ និងសម្រាប់រយៈពេលយូរ»។