អង្គការលំនៅឋានមនុស្សជាតិកម្ពុជា បាន​បញ្ច​ប់​ការ​អនុវត្ត​គម្រោង​ការ​ធ្វើ​ឱ្យ​ប្រសើរ​ឡើង​នូវ​ភាព​ធន់​នឹង​ការប្រែប្រួលអាកាសធាតុ និងប្រាក់ចំណូលប្រជាជនក្នុងសហគមន៍ព្រែកហ្លួង ស្រុកឯកភ្នំ ខេត្តបាត់ដំបង ក្នុងរយៈពេល ៣ឆ្នាំ ចាប់ពីខែមករា ឆ្នាំ២០២១ ដល់ខែធ្នូ ឆ្នាំ២០២៣ ដែល​ផ្តោត​លើ​កម្មវិធីសំខាន់ៗចំនួនបីរួមមានការបង្កើតនូវសុវត្ថិភាពសម្រាប់ការបន្ស៊ាំអាកាសធាតុ តាម​រយៈ​ការ​ផ្តល់​លំនៅឋាន ការបង្កើនប្រាក់ចំណូលតាមរយៈការអនុវត្តសួនបន្លែ ដែលបន្ស៊ាំ​ទៅ​នឹង​ការ​ប្រែប្រួល​អាកាសធាតុ និងការពង្រឹង​សមត្ថភាព​មូលដ្ឋាន​លើ​ការ​បន្ស៊ាំ​ទៅ​នឹង​ការ​ប្រែប្រួល​អាកាស​ធាតុ និងការគ្រប់គ្រងគ្រោះមហន្តរាយ។

លោកស្រី ប៊ឺណាដែត បូឡូឌ្យូធី នាយិកាអង្គការលំនៅឋានមនុស្សជាតិអន្តរជាតិប្រចាំតំបន់មេគង្គ និង​ជា​នាយិកានៃអង្គការលំនៅឋានមនុស្សជាតិកម្ពុជាបានមានប្រសាសន៍ថា អង្គការ​លំនៅ​ឋាន​មនុស្ស​ជាតិ​កម្ពុជា​បាន​សម្រេច​បាន​នូវ​លទ្ធផល​សំខាន់ៗ​គួរ​ឱ្យ​កត់​សម្គាល់​ជា​ច្រើន​នៅ​ឃុំ​ព្រែកហ្លួង។ ស្រប​តាមយុទ្ធ​សាស្ត្រសាង​សង់​ និង​ធ្វើឲ្យមានឥទ្ធិពលរបស់អង្គការ​លំនៅឋាន​មនុស្ស​ជាតិ​កម្ពុជា គម្រោងរបស់យើងមិនត្រឹមតែផ្តល់ផ្ទះដែលមានភាពធន់ចំនួន៣៥ខ្នង ប៉ុណ្ណោះទេ ប៉ុន្តែ​ថែម​ទាំងផ្តល់អំណាចដល់សហគមន៍តាមរយៈការដាំដំណាំដែលសម្របនឹងអាកាសធាតុ និង​ការបណ្តុះបណ្តាលការគ្រប់គ្រងគ្រោះមហន្តរាយផងដែរ។ លទ្ធផលទាំងនេះស្របយ៉ាងរលូន​ជាមួយ​នឹងចក្ខុវិស័យរបស់អង្គការលំនៅឋានមនុស្សជាតិកម្ពុជា សម្រាប់សហគមន៍ប្រកប​ដោយ​និរន្តរភាព និងរឹងមាំ។

ចំណែក លោក អ៊ុំ ភឿន ប្រធានកម្មវិធីគម្រោងអង្គការលំនៅឋានមនុស្សជាតិ​កម្ពុ​ជា​បាន​ថ្លែង​ឱ្យ​ដឹង​ថា ជាលទ្ធផលដែលសម្រេចបានតាមរយៈគម្រោងនេះ គ្រួសារងាយរងគ្រោះចំនួន ៣៥​គ្រួសារ បានទទួលផ្ទះដែលមានសុវត្ថិភាព និងសន្តិសុខ ដែលអាចរួមចំណែកឆ្លើយទៅតបទៅនឹង​ផលប៉ះពាល់​នៃការប្រែប្រួលអាកាសធាតុ។

ជាមួយគ្នានោះ ប្រជាពលរដ្ឋជាអ្នកទទួលផលពីគម្រោង បានបង្ហាញអារម្មណ៍សប្បាយរីករាយ និង​ថ្លែងអំណរគុណដល់អង្គការលំនៅឋានមនុស្សជាតិកម្ពុជាដែលបានផ្ដល់ផ្ទះ និងការ​បណ្ដុះ​បណ្ដាល​ជំនាញ​កសិកម្ម​ឆ្លាត​វៃ​ដែល​បន្ស៊ាំ​ទៅ​នឹង​អាកាស​ធាតុ​ដែល​ធ្វើ​ឱ្យ​ស្ថាន​ភាព​ជីវភាព​រស់​នៅ​របស់​ពួក​គាត់បានប្រសើរឡើងជាលំដាប់។

សូមរំលឹកថា អង្គការ​លំនៅ​ឋាន​មនុស្ស​ជាតិ​កម្ពុជា​គឺ​ជា​ផ្នែក​មួយ​នៃ​អង្គការ​លំនៅ​ឋាន​មនុស្ស​ជាតិ​អន្តរជាតិ បានចាប់ផ្តើមប្រតិបត្តិការនៅឆ្នាំ ២០០៣ ដោយធ្វើការជាមួយក្រុមចម្រុះនៃអង្គការជាតិ និង​អន្តរជាតិ ស្ថាប័នមីក្រូហិរញ្ញវត្ថុ ដៃគូក្នុងវិស័យឯកជន អាជ្ញាធរមូលដ្ឋាន និង​ថ្នាក់ជាតិ។ រហូត​មក​ដល់​ពេលនេះអង្គការលំនៅឋានមនុស្សជាតិកម្ពុជាបម្រើប្រជាពលរដ្ឋជាង ១៧ម៉ឺនគ្រួសារ ដើម្បី​កសាងជីវិតកាន់តែប្រសើរឡើងតាមរយៈផ្ទះដែលមានសុវត្ថិភាព និងតម្លៃសមរម្យ​៕ អត្ថបទ៖ នឿត​ សុភ័ក្ត្រ