ពោធិ៍សាត់ ៖ ​ព្រឹកថ្ងៃទី១៦ ខែតុលា​ ឆ្នាំ២០២០ ឯកឧត្តម​ ទេសរដ្ឋមន្រ្តី​ លី ធុជ​ អនុប្រធានទី១ អាជ្ញាធរមីន​ និង​ឯកឧត្តម​ ម៉ៅ ធនិន​ អភិបាលខេត្តពោធិ៍សាត់ ​ បានចុះចែកគ្រឿងឧបភោគ–បរិភោគ និង​ថវិកា​មួយ​ចំនួន​ជូន​ដល់​​ប្រជាពលរដ្ឋ​ចំនួន​១០០គ្រួសារ ស្ថិតក្នុងឃុំលាចស្រុកភ្នំក្រវាញខេត្ត ពោធិ៍សាត់ ។ គ្រឿង​ឧបភោគ–បរិភោគ​ នាថ្ងៃនេះ​ មានការ​ចូលរួម​ចំណែក​ពី​សមាគម​ជួយ​សង្គ្រោះ​ប្រជាជន​នៅ​កម្ពុជា ​ផងដែរ។

ឆ្លៀតក្នុងឱកាសនោះ ​ឯកឧត្តម​ ​ទេសរដ្ឋមន្រ្តី ​បាន​ពាំនាំ​នូវសេចក្ដី​សួរសុខទុក្ខ ការ​អាណិតអាសូរ និង​ការ​សោកស្ដាយ​របស់​សម្តេចតេជោ ​និងសម្តេចកិត្តិព្រឹទ្ធ​ ជូន​ចំពោះបងប្អូន​ប្រជាពលរដ្ឋ​ទូទាំង ខេត្តពោធិ៍សាត់ ​ក៏ដូចជា​ប្រជាពលរដ្ឋ​ក្នុង​ស្រុក​ភ្នំក្រវាញ ។ លោក ​បន្តទៀតថា សម្តេច​ ទាំង​ទ្វេ​ មិន ដែល​បោះបង់​ បងប្អូន​ជនរួមជាតិណា​ម្នាក់​ឡើយ ។

ទន្ទឹម​នឹងនោះ ឯកឧត្តម​​ទេសរដ្ឋមន្រ្តី បាន​អញ្ជើញ​ចូលរួម​ចែក​អំណោយ​ជា​មួយកាក​បាទ​ក្រហម​កម្ពុជា​ដឹកនាំ ​ដោយ​ ឯកឧត្តម អ៊ុយ សំអាត ប្រធាន​នាយកដ្ឋានគ្រប់គ្រងគ្រោះមហន្តរាយ​ នៃ កាកបាទក្រហមកម្ពុជា​​ តំណាងដ៏ខ្ពង់ខ្ពស់​របស់​សម្តេចកិត្តិព្រឹទ្ធ​បណ្ឌិត ​ប៊ុន​ រ៉ានី​ ហ៊ុន សែន ប្រធាន កាកបាទ​ក្រហម​កម្ពុជា​ នៅ​ឃុំបាក់ចិញ្ចៀន ស្រុក​ភ្នំក្រវាញ​ផងដែរ៕