ភ្នំពេញ៖ ថ្ងៃទី១ នៃពិធីបុណ្យអុំទូក បានកត់សម្គាល់ឃើញថា ប្រជាពលរដ្ឋយ៉ាងច្រើនកុះករ ព្រមទាំងភ្ញៀវជាតិ និងអន្តរជាតិ អញ្ញើញទស្សនាយ៉ាងសប្បាយរីករាយ ជាមួយទិដ្ឋភាពនៃការរៀបចំដ៏ទាក់ទាញ ខណៈពេលដែលមានការថែរក្សាសុខសណ្តាប់ធ្នាប់បានយ៉ាងល្អប្រសើរពីសំណាក់កម្លាំងសមត្ថកិច្ច។

លោក សំ សុជាតិ ពលរដ្ឋមកពីស្រុកវាលរេញ ខេត្តព្រះសីហនុ បានឲ្យទូរទស្សន៍ព័ត៌មាន ប៊ីធីវី ដឹងនៅព្រឹកថ្ងៃទី២៦ ខែវិច្ឆិកានេះថា បន្ទាប់ពីអាក់ខានប្រារព្ធពិធីបុណ្យអុំទូករយៈពេល ៣ឆ្នាំកន្លងមក ក្នុងឆ្នាំ២០២៣នេះបានចាប់ផ្តើមឡើងវិញនូវព្រះរាជពិធីបុណ្យទូក ធ្វើឱ្យលោកមានអារម្មណ៍ថា ពិតជារំភើបសប្បាយរីករាយជាខ្លាំង។ លោកសង្ឈឹមថា ពិធីនេះ នឹងអាចដំណើរការបានឡើងវិញជារៀងរាល់ឆ្នាំ ដើម្បីលើកកម្ពស់វប្បធម៌ អរិយធម៌ ទំនៀមទំលាប់ និងប្រពៃណីជាតិ ក៏ដូចជាផ្តល់ឱកាសឲ្យប្រជាពលរដ្ឋ ភ្ញៀវទេសចរជាតិ និងអន្តរជាតិ បានចូលរួមកម្សាន្តសប្បាយទាំងអស់គ្នា។

ស្រដៀងគ្នានេះ ប្រជាពលរដ្ឋមកពីតំបន់ខុសៗគ្នា បានលើកឡើងថា ថ្ងៃឈប់សម្រាកពិធីបុណ្យអុំទូកនេះ ជាថ្ងៃជួបជុំគ្រួសារដ៏ពិសេស និងបានដើរលេងកម្សាន្តប្រកបដោយភាពសប្បាយរីករាយ ដោយសារអាជ្ញាធររៀបចំសន្តិសុខ សណ្តាប់ធ្នាប់ និងការរក្សាសុខសុវត្ថិភាពបានយ៉ាងល្អប្រសើរជូនប្រជាពលរដ្ឋគ្រប់រូបទាំងអស់។

សូមជម្រាបថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣នេះ មានរយៈពេល ៣ថ្ងៃ ចាប់ពីថ្ងៃទី២៦ ដល់២៨ ខែវិច្ឆិកា។ ដូច្នេះ សូមប្រជាពលរដ្ឋទាំងអស់គ្នា អញ្ញើញចូលរួមឲ្យបានកាន់តែច្រើនកុះករ គ្រាដែលមានការថែរក្សាសុខសណ្តាប់ធ្នាប់ជាប់ជានិច្ចពីសំណាក់កម្លាំងសមត្ថកិច្ចគ្រប់ទីកន្លែង៕ ដោយ ៖ បូរ់ាវី