ភ្នំពេញ ៖ ព្រះករុណាព្រះមហាក្សត្រ សព្វព្រះរាជហឫទ័យប្រោសប្រទានបន្ធូរបន្ថយទោស និងលើកលែងទោសដល់ទណ្ឌិតសម្រាប់ពិធីបុណ្យឯករាជ្យជាតិ និងព្រះរាជពិធីបុណ្យអុំទូក សរុបចំនួន ៥៣៨នាក់។

ឯកឧត្តម គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌បានឱ្យដឹងនៅថ្ងៃទី២៦ ខែវិច្ឆិកា ឆ្នាំ២០២៣នេះថា ក្នុងឱកាសពិធីបុណ្យឯករាជ្យជាតិ និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣នេះ យោងតាមសេចក្តីក្រាបបង្គំទូលថ្វាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ព្រះករុណាព្រះមហាក្សត្រនៃព្រះរាជាណាចក្រកម្ពុជា ទ្រង់សព្វព្រះរាជហឫទ័យប្រោសប្រទានការបន្ធូរបន្ថយទោស និងលើកលែងទោសដល់ទណ្ឌិតសម្រាប់ពិធីបុណ្យទាំងពីរនេះ សរុបចំនួន ៥៣៨នាក់ ក្នុងនោះមានស្រីចំនួន ៤៣នាក់។

ឯកឧត្តម គឹម សន្តិភាព បន្ថែមថា ការបន្ថយទោសរយៈពេល ៣ខែ មានចំនួន ៣៩១នាក់ ការបន្ថយទោសរយៈពេល ៦ខែ មានចំនួន ១៣២នាក់ ការបន្ថយទោសរយៈពេល ៩ខែ មានចំនួន ១២នាក់ និងការបន្ថយទោសរយៈពេល ១២ខែមានម្នាក់ ការបន្ថយទោសមួយជីវិតមកនៅត្រឹម ៣០ឆ្នាំមានម្នាក់ និងលើកលែងទោសស្ត្រីម្នាក់ ដែលជាករណីមនុស្សធម៌ ដោយទណ្ឌិតរូបនោះមានជម្ងឺមហារីកដំណាក់កាលចុងក្រោយ។

ជាមួយគ្នានេះ ឯកឧត្តម គឹម សន្តិភាព បានបញ្ជាក់ជាថ្មីថា គណៈកម្មការជាតិពុំលើកយកមកពិនិត្យពិចារណានោះឡើយ ចំពោះសំណើទាំងឡាយណាទាក់ទងនឹងទណ្ឌិតដែលបានប្រព្រឹត្តអំពើល្មើសទូទៅដូចជា ឧក្រិដ្ឋជនគ្រឿងញៀន អំពើសាហាវយង់ឃ្នង ករណីមិនរាងចាល ប្រព្រឹត្តលើជនរងគ្រោះដែលជាសាច់ញាតិ ឬសហព័ទ្ធ ប្រព្រឹត្តលើជនរងគ្រោះជាមន្ត្រីរាជការ ឬមន្ត្រីសាធារណៈ ទណ្ឌិតធ្លាប់ទទួលបានការបន្ធូរបន្ថយទោសម្តងរួចមកហើយ និងចំពោះបទល្មើសរំលោភផ្លូវភេទដូចជា ជនរងគ្រោះជាអនីតិជនអាយុក្រោម១៤ឆ្នាំ ជនរងគ្រោះជាជនមានវិបល្លាសស្មារតី ឬពិការ ជនរងគ្រោះជាសាច់សាលោហិត ករណីរំលោភបូក និងករណីប៉ុនប៉ង ឬបៀតបៀនកេរ្តិ៍ខ្មាសលើជនរងគ្រោះជាសាច់សាលោហិត៕ អត្ថបទ ៖ ប្រាក់ វ៉ាន់ដា