ប្រទេសរុស្ស៊ីបាននិយាយថា ព្យុះសង្ឃរា និងទឹកជំនន់ដ៏ធ្ងន់ធ្ងរបានធ្វើ​ឱ្យ​មនុស្ស​ប្រហែល ១,៩​លាន​នាក់​គ្មានថាមពលអគ្គិសនីប្រើប្រាស់នៅភាគខាងត្បូង ដោយ​សំដៅលើ​តំបន់​ជា​ច្រើន​របស់​អ៊ុយក្រែន​ដែល​ត្រូវបានដាក់បញ្ចូលជាឧបសម្ព័ន្ធខុសច្បាប់ដោយទីក្រុងមូស្គូ។ 

ក្រសួងថាមពលរបស់រុស្ស៊ីនិយាយថា គ្រោះមហន្តរាយដ៏អាក្រក់បំផុតគឺនៅក្នុងតំបន់ Dagestan តំបន់ Krasnodar និង តំបន់ Rostov ក៏ដូចជា តំបន់ Donetsk តំបន់ Luhansk តំបន់ Kherson តំបន់Zaporizhzhia និង Crimea របស់អ៊ុយក្រែន។ 

មានមនុស្ស​យ៉ាង​ហោចណាស់៤នាក់ បានស្លាប់ជាប់ពាក់ព័ន្ធនឹងខ្យល់ព្យុះនោះ ត្រូវ​បាន​រាយការណ៍​ដោយប្រព័ន្ធផ្សព្វផ្សាយក្នុងស្រុក។អ៊ុយក្រែននិយាយថា ភូមិ និងទីប្រជុំជនចំនួន ២.០១៩ ទីតាំង របស់ខ្លួនពុំមានថាមពលអគ្គិសនីប្រើប្រាស់ បន្ទាប់ពីព្យុះព្រិលរដូវរងានេះ។

ព្យុះនេះ ក៏កំពុងវាយលុកប្រទេសម៉ុលដាវី ហ្សកហ្ស៊ី និងប៊ុលហ្គារី ផងដែរ។ នៅ​កំពង់ផែ​សមុទ្រ​ខ្មៅ​ នៃទីក្រុង Sochi របស់រុស្ស៊ី គេបានមើលឃើញមានរលកធំៗ វាយ​បោកមាត់​សមុទ្រ​របស់​ទីក្រុង​នេះ ។

នៅទីក្រុងមូស្គូ ក្រុមអាជ្ញាធរត្រូវដាក់ពង្រាយគ្រឿងចក្រជំនាញ ដើម្បីបោសសម្អាតផ្លូវនានា បន្ទាប់​ពី​ព្រិល​ធ្លាក់ខ្លាំង។

នៅឧបទ្វីប Crimea ភាគខាងត្បូងនៃប្រទេសអ៊ុយក្រែន ត្រូវបានបញ្ចូល​ដោយ​រុស្ស៊ី​ដោយ​ខុស​ច្បាប់​កាល​ពីឆ្នាំ ២០១៤ មន្ត្រីដែលលើកបន្តុប​ដោយ​ទីក្រុងមូស្គូ​បាន​រាយការណ៍​អំពី​ទឹកជំនន់​នៅ​តំបន់​ឆ្នេរសមុទ្រ។ ដើមឈើដួលរលំ និងកំទេចកំទីផ្សេងទៀតត្រូវ​បាន​គេឃើញ​នៅ​ពាស​ពេញ​តាម​ដង​ផ្លូវ​ នៃទីក្រុងជាច្រើន។

ក្រសួងសគ្រាអាសន្នរុស្ស៊ី បានរាយការណ៍កាលពីថ្ងៃចន្ទទី២៧វិច្ឆិកាថាមនុស្សម្នាក់ស្លាប់ និង១០​នាក់​រងរបួស និងជារាប់រយនាក់ត្រូវបានជម្លៀស ៕