សមាជិកសហជីពពាណិជ្ជកម្ម និងអ្នកគាំទ្រអៀរឡង់ ចូលរួមបាតុកម្មនៅទីក្រុង Dublin កាល​ពីថ្ងៃ​ចន្ទ ២៧ វិច្ឆិកា ដើម្បីប្រឆាំង​នឹងអំពើកុបកម្មដែលបង្កឡើងដោយការ​ចាក់​ដោយ​កាំបិត​លើ​កុមារ​បីនាក់កាលពីថ្ងៃព្រហស្បតិ៍ ២៣ វិច្ឆិកាសប្ដាហ៍មុន។

ក្រុមបាតុករបានកាន់បដាដែលនិយាយថា ប្រយុទ្ធប្រឆាំងនឹងការគំរាមកំហែងរបស់ពួកហ្វាស៊ីស និងការរួបរួមលើការបែកបាក់ ដែលបង្ហាញ​ពី​សាមគ្គីភាព សម្រាប់​កម្មករ​ដែល​រង​ការ​វាយ​ប្រហារ​ក្នុង​កុបកម្មទាំងនោះ។

លោក Owen Reidy អគ្គលេខាធិការនៃសភាសហជីពពាណិជ្ជកម្មអៀរឡង់ ដែលជា​ស្ថាប័ន​ដ៏សំខាន់​មួយបាននិយាយថា យើងឈរជាមួយកម្មករទាំងនោះ ហើយយើងចង់​បាន​ប្រទេស​អៀរ​ឡង់​​រួបរួមគ្នា។

នគរបាល​បានស្តីបន្ទោសក្រុមអ្នកញុះញង់ស្តាំនិយម​ចំពោះការចាប់ផ្តើមអំពើ​ហិង្សា​កាល​ពី​ថ្ងៃ​ព្រហស្បតិ៍ បន្ទាប់ពីក្រុមបាតុករប្រឆាំងជនអន្តោប្រវេសន៍​មួយក្រុមតូច​បានទៅដល់​កន្លែង​កើត​ហេតុ នៃ​ការចាក់ដោយកាំបិតលើកុមារ និងប៉ះទង្គិចជាមួយនគរបាល។  

នគរបាលដែលនិយាយថាពួកគេមិនបានច្រានចោលការលើកឡើងណាមួយរួមទាំងថាវាពាក់ព័ន្ធនឹងអំពើភេរវកម្មនោះ ពុំបាន​ធ្វើ​អត្ថាធិប្បាយ​អំពី​សញ្ជាតិ​របស់ បុរសម្នាក់ដែលត្រូវបានឃាត់ខ្លួន​ពាក់ព័ន្ធ​នឹងហេតុការណ៍ចាក់ដោយកាំបិតនោះទេ ប៉ុន្តែមានការសន្និដ្ឋានភ្លាមៗ​តាម​អ៊ីនធឺណិត​ថា​បុរស​រូប​នោះជាជនបរទេស៕