ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ បានថ្លែងប្រាប់BTV ព័ត៌មាន នាព្រឹកថ្ងៃទី២៨ ខែវិចិ្ឆកា ឆ្នាំ២០២៣នេះថា៖ រយៈពេល២ថ្ងៃ នៃពិធីបុណ្យអុំទូក ប្រជា​ពលរដ្ឋ​មកទទួលសេវាតាមជម្រកតង់ពិនិត្យសុខភាព មានចំនួនជាង៦២០០នាក់។

ឯកឧត្តមវេជ្ជបណ្ឌិត ងី មានហេង បានបន្តថា សម្រាប់ក្រុមគិលានសង្រ្គោះ សម្រាប់​ពិធី​បុណ្យ​អុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣ មន្ទីរសុខាភិបាលរាជធានីភ្នំពេញ ដែល​មាន​ការដឹកនាំដោយក្រសួងសុខាភិបាល និងរដ្ឋបាលរាជធានីភ្នំពេញ យើងបាន​រៀបចំ​កម្លាំង​ក្រុ​​មការងារគ្រូពេទ្យជិត១៥០០នាក់ សម្រាប់ធ្វើការប្តូរវេណគ្នា ក្នុងរយៈពេល៣ថ្ងៃ នៃ​ពិធី​បុណ្យ​អុំទូក ប៉ុន្តែកម្លាំងក្រុមគ្រូពេទ្យយើង មិនគ្រប់គ្រាន់នោះទេ ព្រោះផ្គួប​ផ្សំ​ជាមួយ​ក្រុម​ការងារ​គ្រូពេទ្យ​ពី​ក្រសួងសុខាភិបាល ដោយយកម្លាំងពីក្រុមគ្រូពេទ្យថ្នាក់ជាតិ និងក្រុមគ្រូ​ពេទ្យ​បណ្តា​ខេត្ត​នានា​មក​បន្ថែម ដែលមានសរុបចំនួនជាង២០០០នាក់ រីឯរថយន្តសង្រ្គោះ​មនី្ទរ​សុខាភិបាល​រាជ​ធានី​ភ្នំពេញ ដាក់ចំនួន១២ក្រុម បូករួមទាំងក្រសួង គឺចំនួន៧០គ្រឿង និងរថយន្ត​គី្លនិក​ចល័ត​ចំនួន​៤​គ្រឿង សម្រាប់ពង្រាយតាមទីតាំងកន្លែងកម្សាន្តនានា ជម្រកតង់ផ្តល់សេវាមានចំនួន១៦ ដើម្បី​ផ្តល់​សេវា និងអប់រំសុខភាពជូនបងប្អូនប្រជាពលរដ្ឋ និងភ្ញៀវបរទេស មកកម្សាន្ត​នាឱកាស​បុណ្យ​អុំទូក​នេះ ជាពិសេសបញ្ហាបង្ការនិងទប់ស្កាត់ជំងឺអេដស៍។

ចំណែកលោកវេជ្ជបណ្ឌិត ហុង ចិន្តា ប្រធានផ្នែករថយន្តសង្រ្គោះបន្ទាន់ ប្រចាំ​ការ​នៅ​គោល​ដៅ​នាយកដ្ឋាន​អង្គរក្ស បានលើកឡើងថា ក្នុងគោលដៅ មានក្រុមប្រចាំការចំនួន២ក្រុម និងរថយន្ត​គិលា​នសង្រ្គោះចំនួន២គ្រឿង និងក្រុមការងារគ្រូពេទ្យចំនួន២០នាក់ ដើម្បី​ផ្តល់​សេវា​ជូន​ប្រជា​ពលរដ្ឋ​ផងដែរ។

ជាមួយគ្នានោះដែរ ប្រជាពលរដ្ឋមកពីខេត្តបាត់ដំបង មកកម្សាន្តក្នុងពិធីបុណ្យអុំទូក មាន​អាការៈ​មិន​ស្រួល​ខ្លួន មកទទួលសេវាសុខាភិបាល ពីក្រុមគ្រូពេទ្យ បាននិយាយថា ក្រុមគ្រួសាររបស់គាត់ បាន​មកចូលរួមពិធីបុណ្យអុំទូក មានរយៈពេល២ថ្ងៃមកហើយ បើគិតទាំងថ្ងៃនេះទៀត គឺ៣ថ្ងៃ ព្រោះ​ពិធីបុណ្យអុំទូក បានអាក់ខានរយៈពេល៣ឆ្នាំមកហើយ។ ដូច្នេះចង់មកសប្បាយ ពិសេស​ឃើញ​ការរៀបចំទាំងសណ្តាប់ធ្នាប់ និងសេវាសុខាភិបាល តាមគោលដៅនីមួយៗ បានយ៉ាង​ល្អ​ប្រសើរ។ ជាក់ស្តែងព្រឹកនេះ គាត់មិនខ្លួន ក៏បានមកជួបគ្រូពេទ្យយកចិត្តទុកដាក់ និងផ្តល់​ថ្នាំ​ជូន​គាត់​ដោយឥតគិតថ្លៃ។

សូមបញ្ជាក់ផងដែរថា គណៈកម្មការការពារសុខភាព និងសង្រ្គោះ​បាន​រៀបចំ​រថយន្ត​គិលាន​សង្រ្គោះ​ចំ​នួន ៧០គ្រឿង៖ ៣២គ្រឿង ប្រតិបតិ្តការគោលដៅ រថយន្ត​សង្រ្គោះ​របស់​រាជ​ធានី​ភ្នំពេញ ចំនួន ១៦គ្រឿង រថយន្តមនី្ទរពេទ្យជាតិ ចំនួន១៤គ្រឿង រថយន្ត​សង្រ្គោះ​របស់​ទីសី្ត​ការ​ក្រសួង​សុខាភិបាល ចំនួន២គ្រឿង រថយន្តសង្រ្គោះមកតាមចំណុះទូក ចំនួន១៨គ្រឿង (មកពី​១០​ខេត្ត) រថយន្តសង្រ្គោះត្រៀម បំរុង មានចំនួន២០គ្រឿង, ៤គ្រឿងមនី្ទរពេទ្យជាតិ តេជោ​សន្តិភាព​, ១៦គ្រឿង មកពី១១ខេត្តផ្សេងគ្នា ក្រៅពីនោះគណៈកម្មការការពារសុខភាព និង​សង្រ្គោះ បានរៀបចំបន្ថែម រថយន្តគ្លីនិកចល័ត ចំនួន៤គ្រឿង៕ អត្ថបទ រដ្ឋា