ប្រជាជនប៉ាឡេស្ទីន បានអបអរសាទរនៅខាងក្រៅពន្ធនាគារ អូហ្វើ (Ofer) នៅប៉ុស្តិ៍ត្រួតពិនិត្យ បៃទុនៀ (Beitunia) នៃតំបន់វេស បែង ខណៈក្រុមអ្នកទោសថ្មីបានបើកឆ្លងកាត់ទីនោះ បន្ទាប់​ពី​ការដោះលែងរបស់ពួកគេ និងដោយមានជំនួយពីកាកបាទក្រហមអន្តរជាតិកាលពីយប់ថ្ងៃអង្គារ (២៨ វិច្ឆិកា)។

អ៊ីស្រាអែលបាននិយាយថា ខ្លួនបានដោះលែងអ្នកទោសប៉ាឡេស្ទីន ៣០នាក់ ពីពន្ធនាគារ អូហ្វើ និង​មជ្ឈមណ្ឌលឃុំឃាំងមួយនៅក្នុងទីក្រុង ហ្សេរុយសាឡឹម (Jerusalem)។ អ្នក​ទោស​ត្រូវ​ដោះលែង​ទាំងនោះរួមមានស្ត្រី ១៥នាក់ និងបុរសវ័យជំទង់ ១៥នាក់ នេះបើយោង​តាម​ក្លឹប​អ្នក​ទោស​ប៉ាឡេស្ទីន ដែលជាអង្គការពាក់កណ្តាលផ្លូវការ។

ការដោះ​លែងរបស់ពួកគេបានកើតឡើងនៅពេលដែលក្រុមហាម៉ាស បានដោះលែង​ចំណាប់​ថ្នូរ​ចំនួន ១២នាក់ បន្ថែមទៀតនៅថ្ងៃទី៥ នៃបទឈប់បាញ់ដែលត្រូវបានបន្លាយរយៈពេលរហូតដល់ ៦ថ្ងៃ រវាងក្រុមសកម្មប្រយុទ្ធប៉ាឡេស្ទីន និងអ៊ីស្រាអែល នៅក្នុងសង្គ្រាមតំបន់ហ្កាហ្សា។

បទ​ឈប់បាញ់នេះបាននាំឱ្យតំបន់ហ្កាហ្សា ទទួលបាន​ការសម្រាក​ជា​លើក​ដំបូង​បន្ទាប់​ពី​ការ​ប្រយុទ្ធ​គ្នារ​យៈពេលប្រាំពីរសប្តាហ៍ និងការទម្លាក់គ្រាប់បែក ដែលបានបំផ្លាញ​ផ្នែក​ជា​ច្រើន​នៃ​តំបន់​ហ្កាហ្សា ស្ទ្រីប ឲ្យក្លាយទៅជាកម្ទេចថ្ម។

ដើមឡើយ បទឈប់បាញ់នេះត្រូវផុតកំណត់រយៈពេញមួយយប់ឈានចូលថ្ងៃអង្គារ ប៉ុន្តែភាគី​ទាំង​ពីរ​បានយល់ព្រមបន្តការផ្អាក ដើម្បីអនុញ្ញាតឱ្យមានការដោះលែងចំណាប់ថ្នូរបន្ថែមទៀត ដែល​ត្រូវ​បាន​ចាប់ខ្លួនដោយក្រុមហាម៉ាស និងដោះលែងអ្នកទោសប៉ាឡេស្ទីន ដែលជាប់​ក្នុង​ពន្ធនាគារ​អ៊ីស្រាអែល៕