សួនច្បារនៅតាមមាត់ទន្លេ និងទីតាំងមួយចំនួនដទៃផ្សេងទៀត ដែលជា​ទីតាំង​ប្រារព្ធ​ពិធី​បុណ្យអុំទូក ត្រូវបានសម្អាតបានស្អាតល្អបណ្តើរៗហើយ ត្បិតមិនបាន១០០ភាគរយ ប៉ុន្តែ​សណ្តាប់​ធ្នាប់របៀបរៀបរយ និងបរិស្ថានអនាម័យ ត្រូវបានពលរដ្ឋមើលឃើញថា មាន​ភាព​ល្អ​ប្រសើរ​ខ្ពស់ ក្រោយបុណ្យអ៊ុំទូក ត្រូវបានបញ្ចប់កាលពីថ្ងៃទី២៨ ខែវិច្ឆិកា ឆ្នាំ២០២៣ម្សិលមិញ ។

ពលរដ្ឋដែលបានដើរលេងកម្សាន្តនៅតាមសួនច្បារមាត់ទន្លេ នាព្រឹកនេះ បានបង្ហាញក្តីរីករាយ និង​មើលឃើញថា ដោយសារប្រទេសជាតិរីកចម្រើន ហើយពលរដ្ឋកាន់​តែមា​ន​ភាព​យល់​ដឹង​បាន​ខ្ពស់​ពីកា​រ​ថែរក្សាបរិស្ថានអនាម័យ ទើបធ្វើឱ្យបរិស្ថានមានភាពស្អាតល្អ បើទោះបីបុណ្យ​អុំទូក​ដែល​ទើប​បញ្ចប់ មានមនុស្សម្នាជាច្រើនលាននាក់បានទៅដើរលេងកម្សាន្តក៏ដោយ ។

ពលរដ្ឋ បន្តថា ការថែទាំបរិស្ថាន ជារឿងសម្ខាន់ណាស់ មិនអាចរំពឹង​តែ​អ្នក​សម្អាត​តែ​មួយ​មុខ​នោះ​ទេ គឺត្រូវទាមទារការចូលរួមពីយើងទាំងអស់គ្នា ដោយហូបចុកហើយ សូមប្រមូល​សំរាម​ចោល​ក្នុង​ធុង​សម្រាម​ជាច្រើន ដែលអាជ្ញាធរបានរៀបចំទុក សម្រាប់ការចោល ។

ក្រុមអ្នកប្រមូលសំរាម បានប្រាប់ឱ្យដឹងថា ៖ នៅព្រឹកនេះ ពួកគាត់មានភាពងាយស្រួល ក្នុង​ការ​ដើរ​ប្រមូល​សំរាម ដោយសារពលរដ្ឋភាគច្រើនបានចូលរួមជាមួយសកម្មភាពថែទាំបរិស្ថាន មិន​ជួប​ការ​លំបាក​ដូចពេលមុនៗកន្លងទៅ ព្រោះតែពលរដ្ឋ​នៅ​មាន​ការ​យល់ដឹ​ង​មាន​កម្រិត​ពី​ការ​ទុក​ដាក់​សំរាម ។ ក្នុងនោះ រយះពេល៣ថ្ងៃ នៃបុណ្យអ៊ុំទូក ក្រុមការងារ បានប្រមូលសំរាមជាប្រចាំ បូករួម​ទាំង​ថ្ងៃ​នេះផងដែរ ដើម្បីធានាឱ្យបានឡើងវិញថា បរិស្ថាន នៅជុំវិញទីតាំង គឺត្រូវស្អាតល្អឡើងវិញ ១០០​ភាគរយ ។

គួររំលឹកថា ព្រះរាជពិធីបុណ្យអ៊ុំទូកបណ្តែតប្រទីប និងសំពះព្រះខែ អកអំបុក ដែលទើបនឹងបញ្ចប់ បាន​ប្រារព្ធទៅរយៈពេល៣ថ្ងៃ គឺនៅថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣ ៕ អត្ថបទ ៖ លីហេង