ធ្លាក់បាក់បាក់ឌុប មិនមែនមានន័យថា ជីវិតយើងរបស់យើងចប់នោះទេ ហើយ​ក៏មិនមែន​មាន​ន័យថា មិនអាចក្លាយជាម្ចាស់អាជីវកម្មដែរ។ យុវជន ម៉ៅ វ៉ាន់ថេន ជានិស្សិតថ្នាក់​បរិញ្ញាបត្ររង​ជំនាញ​មេកានិកទូទៅ នៃវិទ្យាស្ថានជាតិពហុបច្ចេកទេសកម្ពុជា(NPIC) ដែលជាអតីត​សិស្ស​ប្រឡង​ធ្លាក់​បាក់ឌុបម្នាក់ បានមើលឃើញ​ពី​ឱកាស​បង្កើត​មុខ​របរ​ផ្ទាល់​ខ្លួន​នៅ​ស្រុក​កំណើត​ដែល​នឹង​អាច​ធ្វើឱ្យគេមានជីវភាព​ធូធារ​ តាមរយៈ​ជំនាញ​មេកានិច​ផ្នែក​ក្រឡឹង​ដែល​មានទីផ្សារកំពុងត្រូវការ។

យុវជនមកពីខេត្តបាត់ដំបងរូបនេះ ក៏អបអរ​សាទរ​ដល់​សិស្ស​ដែល​ទើប​ប្រឡង​ជាប់​ថ្នាក់​ទី​១២ ទាំង​អស់​ចំពោះជោគជ័យដែលខ្លួនសម្រេចបាន។ ទន្ទឹមនឹងនេះ យុវជន ម៉ៅ វ៉ាន់ថេន ក៏បាន​លើក​ទឹកចិត្ត​ដល់​យុវសិស្ស​ដែល​មិន​ជាប់​បាក់​ឌុប​ឱ្យ​ជ្រើស​រើស​ជំនាញ​បច្ចេក​ទេស​ព្រោះ​ជាមុខ​ជំនាញ​ដែល​មាន​ទីផ្សារត្រូវការទាំងធ្វើការងារយកបទពិសោធន៍ និងបើកអាជីវកម្មផ្ទាល់ខ្លួន៕