ចិន ៖ នាយករដ្ឋមន្ត្រីចិន លោក Li Qiang (លី ឈាង) លើកឡើងថា ទីក្រុងប៉េកាំងចង់ពង្រឹងខ្សែសង្វាក់ផ្គត់ផ្គង់ជាមួយប្រទេសទាំងអស់ ហើយប្រឆាំងនឹងការរំខានណាមួយចំពោះពួកគេ ដោយលោកបានថ្លែងបែបនេះ នៅឯពិធីបើកពិព័រណ៍ខ្សែសង្វាក់ផ្គត់ផ្គង់អន្តរជាតិចិនលើកដំបូង នៅទីក្រុងប៉េកាំង។

ការអត្ថាធិប្បាយរបស់លោក លី កើតឡើងចំពេលដែលទីក្រុងវ៉ាស៊ីនតោនមានបទប្បញ្ញត្តិនាំចេញយ៉ាងតឹងរ៉ឹងកាន់តែខ្លាំងឡើងលើឧបករណ៍អេឡិចត្រូនិក និងធាតុផ្សំសំខាន់ៗផ្សេងទៀត។

លោកនាយករដ្ឋមន្ត្រីបាននិយាយថា៖ «យើងមានឆន្ទៈក្នុងការកសាងភាពជាដៃគូខ្សែសង្វាក់ផ្គត់ផ្គង់ឧស្សាហកម្ម និងផលិតកម្មកាន់តែជិតស្និទ្ធជាមួយប្រទេសទាំងអស់។ យើងនឹងធ្វើឲ្យកិច្ចសហប្រតិបត្តិការអន្តរជាតិកាន់តែស៊ីជម្រៅលើខ្សែសង្វាក់ផ្គត់ផ្គង់ឧស្សាហកម្ម និងការផ្គត់ផ្គង់ជាមួយនឹងសកម្មភាពជាក់ស្តែង»។

ព្រឹត្តិការណ៍រយៈពេល ៥ថ្ងៃ ត្រូវបានរៀបចំឡើងតាមសំណើរបស់ប្រធានាធិបតីចិនលោក Xi Jinping (ស៊ី ជីនពីង)។ ក្រុមហ៊ុនចំនួនជាង ៥០០ មកពីប្រទេសចិន និងក្រៅប្រទេស កំពុងចូលរួម ដោយបង្ហាញពីផលិតផល និងសមត្ថភាពចុងក្រោយរបស់ពួកគេ។

សូមរំលឹកថា តាំងពីឆ្នាំមុន សហរដ្ឋអាមេរិកបានបង្កើនការគ្រប់គ្រងលើការនាំចេញបន្ទះឈីបកុំព្យូទ័រទៅប្រទេសចិន។ ទន្ទឹមនឹងនេះ ចាប់ពីខែធ្នូ ទីក្រុងប៉េកាំងនឹងណែនាំនូវការរឹតបន្តឹងលើការនាំចេញធ្យូងថ្ម ជាធាតុផ្សំដ៏សំខាន់ ដែលយកទៅប្រើក្នុងអាគុយ សម្រាប់រថយន្តអគ្គិសនី។ ប្រទេសចិនបានអនុវត្តរួចហើយលើការគ្រប់គ្រងការនាំចេញសារធាតុរ៉ែសំខាន់ ២យ៉ាង ដែលត្រូវបានប្រើសម្រាប់ផលិតបន្ទះអេឡិចត្រូនិក៕