ចិន ៖ ប្រព័ន្ធផ្សព្វផ្សាយរដ្ឋ CCTV បាននិយាយថា មនុស្ស ១១នាក់ បានស្លាប់នៅក្នុងឧបទ្ទវហេតុមួយនៅឯអណ្តូងរ៉ែធ្យូងថ្មក្នុងខេត្តហ៊ីឡុងជាំង (Heilongjiang) ភាគឦសាននៃប្រទេសចិន កាលពីថ្ងៃអង្គារ (២៨ វិច្ឆិកា)។ 

របាយការណ៍បាននិយាយថា គ្រោះថ្នាក់នេះបានកើតឡើងកាលពីវេលាម៉ោង៣រសៀល (ម៉ោងក្នុងស្រុក) នៅឯអណ្តូងរ៉ែធ្យូងថ្ម ស័ងយ៉ាង (Shuangyang) នៃក្រុមហ៊ុនអណ្តូងរ៉ែ ឡុងម៉ី ស័ងយ៉ាសាង (Longmei Shuangyashan) ក្នុងខេត្តហ៊ីឡុងជាំង ហើយជាដំបូងត្រូវបានគេជឿថាបណ្តាលមកពីការផ្ទុះថ្ម។

ប្រព័ន្ធផ្សព្វផ្សាយ CCTV បានបន្ថែមថា មូលហេតុនៃគ្រោះថ្នាក់នេះ កំពុងស្ថិតនៅក្រោមការស៊ើបអង្កេតបន្ថែម។ ការផ្ទុះថ្មកើតឡើងនៅពេលដែលថាមពលផ្ទុកច្រើនពេកនៅក្នុងថ្ម បណ្តាលឱ្យវាបាក់យ៉ាងធ្ងន់ធ្ងរ។ របាយការណ៍នេះមិនបានផ្តល់ព័ត៌មានថា តើមនុស្សផ្សេងទៀតត្រូវបានជួយសង្រ្គោះរួចហើយឬយ៉ាងណានោះទេ។

អណ្តូងរ៉ែធ្យូងថ្មរបស់ប្រទេសចិន បានជួបឧបទ្ទវហេតុដ៏គ្រោះថ្នាក់ជាច្រើននៅឆ្នាំនេះ បើទោះបីជាមានការអំពាវនាវរបស់រដ្ឋាភិបាលម្តងហើយម្តងទៀតសម្រាប់ការអនុវត្តស្តង់ដារសុវត្ថិភាពកាន់តែតឹងរ៉ឹងក៏ដោយ ខណៈដែលអ្នករុករករ៉ែព្យាយាមបង្កើនទិន្នផលធ្យូងថ្ម៕