ឥណ្ឌា ៖ នាយករដ្ឋមន្ត្រីឥណ្ឌា លោក Narendra Modi បាននិយាយទៅកាន់កម្មករដែលត្រូវបានសង្គ្រោះ តាមទូរស័ព្ទកាលពីថ្ងៃអង្គារ បន្ទាប់ពីពួកគេ បានចេញមកខាងក្រៅដោយជោគជ័យពីផ្លូវក្រោមដីដែលបាក់ស្រុត ក្រោយមានកិច្ចប្រឹងប្រែងជួយសង្គ្រោះរយៈពេល១៧ថ្ងៃ។ ការជម្លៀសមនុស្សទាំង៤១នាក់ ជាកម្មករមានប្រាក់ឈ្នួលទាបមកពីរដ្ឋក្រីក្របំផុតនៅឥណ្ឌាមួយចំនួន បានចាប់ផ្តើមរយៈពេលជាង៦ម៉ោង បន្ទាប់ពីក្រុមអ្នកជួយសង្គ្រោះ បានបំបែកឆ្លងកាត់កម្ទេចកម្ទី នៅក្នុងផ្លូវក្រោមដី ក្នុងរដ្ឋ Uttarakhand ដែលបានរូងចូលកាលពីថ្ងៃទី១២ ខែវិច្ឆិកា។ 

លោក Saba Ahmed ជាកម្មករដែលត្រូវបានសង្គ្រោះម្នាក់ក្នុងចំណោមកម្មករ៤១នាក់ បាននិយាយថា យើងជាសមាជិកមានគ្នា៤១នាក់ ហើយទាំងអស់គ្នាមកពីរដ្ឋផ្សេងៗគ្នា យើងទាំងអស់គ្នាដូចជាបងប្អូន។ កម្មករបានប្រាប់លោក Modi ថា ពួកគេបានដើរនៅក្នុងផ្លូវក្រោមដី និងហាត់ Yoga នៅពេលព្រឹក ដែលបានជួយឲ្យពួកគេ នៅមានរាងកាយមាំទាំ។ លោក Modi បានអបអរកម្មករទាំងអស់ ដែលត្រូវបានជួយសង្គ្រោះ និងបានកោតសរសើរការតាំងចិត្តនិងភាពអត់ធ្មត់របស់ពួក។

កម្មករទាំងអស់ត្រូវបានទាញចេញដាក់នៅលើគ្រែស្នែងអ្នករបួសមានកង់រុញ តាមបំពង់ដែកថែបធំទំហំ ៩០សង់ទីម៉ែត្រ ដោយដំណើរការពេញលេញត្រូវបានបញ្ចប់ក្នុងរយៈពេលប្រហែល១ម៉ោង។ កម្មករដែលត្រូវបានជួយសង្គ្រោះ ពេលនេះកំពុងស្ថិតនៅក្នុងមណ្ឌលសុខភាពក្នុងតំបន់ ហើយត្រូវបានគេរំពឹងថា នឹងធ្វើដំណើរទៅកាន់លំនៅឋាន បន្ទាប់ពីវេជ្ជបណ្ឌិតពិនិត្យច្បាស់លាស់នូវស្ថានភាពសុខភាពរបស់ពួកគេ។