អង្គការសុខភាពពិភពលោក (WHO) កាលពីថ្ងៃពុធ ២៩ ខែវិច្ឆិកា បាន​អំពាវនាវ​ឱ្យ​ហេដ្ឋា​រចនាសម្ព័ន្ធ​សុខភាពដែលងាយរងគ្រោះនៅតំបន់ហ្កាហ្សាត្រូវតែទទួលបានការការពារ ខណៈ​តំបន់​​រងការ​ឡោមព័ទ្ធ​ហែកហួរ​ដោយ​សង្រ្គាម​មួយ​នេះ​ប្រឈម​នឹង​ការ​កើន​ឡើង​ហានិភ័យ នៃ​ជំងឺ​ឆ្លង និងបញ្ហាប្រឈមជាច្រើនទៀតនៅក្នុងការទប់ស្កាត់ជំងឺឆ្លងទាំងឡាយ។

កិច្ចព្រមព្រៀងបទឈប់បាញ់ដ៏ផុយស្រួយរវាងអ៊ីស្រាអែល និងក្រុមហាម៉ាស កាល​ពី​សប្តាហ៍​មុន​បាន​អនុញ្ញាត​ឱ្យអង្គការនេះ និងអង្គការផ្ដល់ជំនួយនានាបង្កើនការផ្គត់ផ្គង់សំខាន់ៗរបស់ខ្លួន ប៉ុន្តែ​ជំនួយ​ទាំង​នេះមិន​អាច​គ្រប់​គ្រាន់ ដើម្បី​បំពេញ​តម្រូវ​ការ​របស់​ប្រជាជន ២,៣​លាន​នាក់​នៅ​ហ្កាហ្សា​បានទេ។

ថ្លែងនៅក្នុងសន្និសីទសារព័ត៌មាននៅទីក្រុងហ្សឺណែវ ប្រមុខអង្គការសុខភាពពិភពលោក លោក Tedros Adhanom Ghebreyesus បាននិយាយថា មានតែមន្ទីរពេទ្យ ១៥ ប៉ុណ្ណោះ​ក្នុង​ចំណោម​មន្ទីរពេទ្យចំនួន ៣៦ កន្លែងរបស់តំបន់ហ្កាហ្សានៅតែដំណើរការ ប៉ុន្តែមន្ទីរ​ពេទ្យ​ទាំង​នោះ​ត្រូវ​បានផ្ទុកពេញដោយអ្នកជំងឺហួសចំណុះ។ 

អង្គការ​សុខភាព​ពិភពលោក​បាន​បង្ហាញ​ក្ដី​បារម្ភ​យ៉ាង​ខ្លាំង​ចំពោះ​ការ​រីក​រាល​ដាល​ នៃ​ជំងឺ​ឆ្លង​នៅ​ក្នុង​តំបន់​ហ្កាហ្សា ជាទីដែល​ចរន្ត នៃ​ការ​ចល័ត​ទីលំនៅ​ខាង​ក្នុង​នៃ​ចំនួន​ប្រជាជន​ទាំង​អស់​បាន​បណ្តាល​ឱ្យ​មាន​ភាពចង្អៀតណែន នៅក្នុងទីជម្រកនានា និងកន្លែងរស់នៅ​បណ្តោះ​អាសន្ន​ផ្សេង​ទៀត​។

ទីភ្នាក់ងារ​នេះបានកត់សម្គាល់ពីការកើនឡើងដ៏គួរឱ្យភ្ញាក់ផ្អើលនៃកំណើនករណីជំងឺរាគរូស ជា​ពិសេស​ក្នុង​ចំណោមទារក និងកុមារ ហើយបានរកឃើញ សញ្ញា​ធ្ងន់ធ្ងរ​បំផុត​ជុំវិញ​ជំងឺ​ខាន់​លឿង​ដ៏​ច្រើន​នៅក្នុងតំបន់រងការឡោមព័ទ្ធមួយនេះ។

លោក រីឆាត ភីភើខន (Richard Peeperkorn) អ្នកតំណាង​អង្គការ​សុខភាព​ពិភពលោក​ប្រចាំ​តំបន់​កាន់​កាប់ប៉ាឡេស្ទីនបានព្រមានថា ការបន្តកើត​មាន​អំពើ​ហិង្សា​ណាមួយ​អាច​បំផ្លាញ​គ្រឹះ​ស្ថាន​សុខាភិបាល និងធ្វើឱ្យកន្លែងថែទាំសុខភាព នានា លែងដំណើរការបានទាំងស្រុង៕