យោងតាមសមាគមន៍ Kissinger Associates លោកហិនរី ឃីសស៊ីនជើ(Henry Kissinger) ដែល​ជាអ្នកឈ្នះរង្វាន់ណូបែលសន្តិភាពដ៏ចម្រូងចម្រាស និងជាអ្នក​ទូត​ដ៏​មាន​ឥទ្ធិពល​ដែល​បម្រើ​ការ​ក្រោម​ការដឹកនាំរបស់ប្រធានាធិបតីពីររូប បានបន្សល់ទុក​នូវ​ដំណែល​ដែល​មិន​អាច​លុប​បំបាត់​បាន​លើ​គោលនយោបាយការបរទេសរបស់សហរដ្ឋអាមេរិកនោះ បានទទួល​មរណភាព​កាល​ពី​ថ្ងៃ​ពុធ​២៩ វិច្ឆិកា ។សមាគមន៍ Kissinger Associates បាននិយាយថាលោក Kissinger បាន​ទទួល​មរណភាពនៅគេហដ្ឋានរបស់លោកនៅរដ្ឋ ខុននេកធីខិត (Connecticut) សហរដ្ឋ​អាមេរិក។

លោក Kissinger បានចូលរួមកិច្ចប្រជុំនៅសេតវិមាន បោះពុម្ពផ្សាយសៀវភៅនិយាយពីភាពជាអ្នកដឹកនាំ និងផ្តល់សក្ខីកម្មនៅចំពោះមុខគណៈកម្មាធិការព្រឹទ្ធសភាអំពីការគំរាមកំហែងនុយក្លេអ៊ែរដែលបង្កឡើងដោយកូរ៉េខាងជើង។ កាលពីខែកក្កដាឆ្នាំ២០២៣ លោកបានធ្វើទស្សនកិច្ចដ៏គួរឱ្យភ្ញាក់ផ្អើលមួយទៅកាន់ទីក្រុងប៉េកាំង ជួបជាមួយប្រធានាធិបតីចិន លោកXi Jinping ។ កាលពីទសវត្សរ៍ឆ្នាំ១៩៧០ លោកមានស្នាដៃនៅក្នុងព្រឹត្តិការណ៍ពិភពលោកដែលផ្លាស់ប្តូរសម័យកាលជាច្រើនទសវត្សរ៍ ក្នុងពេលលោកបម្រើការជារដ្ឋមន្ត្រីការបរទេសក្រោមការដឹកនាំរបស់អតីតប្រធានាធិបតីមកពីគណបក្សសាធារណរដ្ឋ លោក រីឆាត នីស៊ុន(Richard Nixon) ។

កិច្ចខិត​ខំប្រឹងប្រែងរបស់ជនភៀសខ្លួនជ្វីហ្វដើមកំណើតអាល្លឺម៉ង់ រូបនេះ បាននាំទៅ​ដល់​ការ​បើក​ទំព័រ​ការ​ទូតរបស់ប្រទេសចិន និងកិច្ចចរចាគ្រប់គ្រងអាវុធរវាអាមេរិក និងសូវៀត បាន​ពង្រីក​ទំនាក់​ទំនង​រវាងអ៊ីស្រាអែល និងប្រទេសជិតខាងអារ៉ាប់ និងកិច្ចព្រម​ព្រៀង​ទី​ក្រុង​ប៉ារីស​ជាមួយ​វៀតណាម​ខាងជើង។គួររម្លឹកថា លោក ហេនស៍ អាល់ហ្វ្រេដ ឃីសស៊ីនជើ (Heinz Alfred Kissinger) បានកើត ថ្ងៃទី២៧ខែឧសភាឆ្នាំ១៩២៣ នៅក្នុងទីក្រុង ហ្វើសធ៍ (Furth)ប្រទេស​អាល្លឺម៉ង់ និង បានផ្លាស់ទីលំនៅទៅរស់នៅសហរដ្ឋអាមេរិក ជាមួយ​គ្រួសារ​របស់​លោក​ក្នុង​ឆ្នាំ​១៩៣៨ មុនយុទ្ធនាការណាស៊ីសក្នុងការលុបបំបាត់ជនជាតិជ្វីហ្វនៅតំបន់អឺរ៉ុប៕