ភ្នំពេញ ៖ កម្ពុជា ប្រារព្ធទិវាពិភពលោកប្រយុទ្ធនឹងជំងឺអេដស៍ ១ធ្នូ ២០២៣ ក្រោមប្រធានបទ"សហគមន៍តែមួយដឹកនាំឆ្ពោះទៅបញ្ចប់ជំងឺអេដស៍" នៅវិមានសន្តិភាព ព្រឹកថ្ងៃទី៣០ ខែធ្នូ ឆ្នាំ២០២៣នេះ ក្រោមអធិបតីភាពឯកឧត្តមឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត។

​ទិវាពិភពលោកប្រយុទ្ធនឹងជំងឺអេដស៍ ១ធ្នូ ២០២៣ មានការអញ្ជើញចូលរួមពីឯកឧត្តម អៀង មូលី ទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជំងឺអេដស៍, ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ឯកឧត្តម លោកជំទាវ សមាជិក សមាជិការាជរដ្ឋាភិបាល ថ្នាក់ដឹកនាំក្រសួង ស្ថាប័ន ឯកឧត្តម លោកជំទាវ តំណាងអង្គទូត នានាប្រចាំព្រះរាជាណា ចក្រ កម្ពុជា និងលោកស្រី Patricia Ongpin នាយិកាអង្គការ UNAIDS ប្រចាំប្រទេសកម្ពុជា ឡាវ និងម៉ាឡេស៊ី។

ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានបញ្ជាក់ដោយយោងតាមប្រភពទិន្នន័យសង្ខេបឆ្នាំ២០២២ របស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ និងអង្គការUNAIDS បានឱ្យដឹងថា ចំនួនប៉ាន់ស្មានអ្នកផ្ទុក    មេរោគអេដស៍សរុប មានប្រមាណ ៧៦.០០០នាក់។ ក្នុងនោះ អ្នកមកធ្វើតេស្តឈាមនិងបានដឹងពីស្ថានភាពផ្ទុកមេរោគអេដស៍របស់ខ្លួនមានចំនួន ៦៧.៣៨៣នាក់ ស្មើនឹងប្រមាណ៨៦%។ ជាមួយគ្នានេះ ៩៩%នៃអ្នកផ្ទុកមេរោគអេដស៍ដែលបានដឹងពីស្ថានភាពរបស់ខ្លួន បានទទួលការព្យាបាលដោយឱសថប្រឆាំងមេរោគអេដស៍។ ហើយ៩៨%នៃអ្នកដែលបានទទួលការព្យាបាល ត្រូវបានពិនិត្យឃើញថាមានការកាត់បន្ថយចំនួនមេរោគមកនៅកម្រិតទាបបំផុត។ 

- ចំនួនប៉ាន់ស្មាននៃអ្នកឆ្លងថ្មី មាន ១.៤០០នាក់ (មានការកើនឡើង ៣០០នាក់ បើប្រៀបធៀបនឹងតួលេខក្នុងឆ្នាំកន្លងទៅ ដែលមានត្រឹមតែ ១.១០០នាក់ប៉ុណ្ណោះ) និងអ្នកស្លាប់មានចំនួន ១.១០០នាក់ ( ឬមានមនុស្ស៤នាក់បានឆ្លងថ្មីក្នុង១ថ្ងៃ និងមានមនុស្សស្លាប់ដោយសារជំងឺអេដស៍ ៣នាក់ក្នុង១ថ្ងៃ) ។

- ការវិភាគក៏បានបង្ហាញថា កំណើននៃការឆ្លងមេរោគអេដស៍ថ្មីគឺស្ថិតក្នុងចំណោមបុរស និងក្មេងប្រុស មានចំនួន៧៩% ហើយ៨៣% នៃអ្នកឆ្លងថ្មី គឺជាក្រុមប្រឈម ឬជាក្រុមប្រជាជនគន្លឹះ។  

 នាឱកាសនោះក្នុងនាមសម្តេចធិបតីនាយករដ្ឋមន្រ្តី ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ សូមសម្ដែងនូវអំណរគុណយ៉ាងជ្រាលជ្រៅបំផុតជូនចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែ ន ប្រធានកាកបាទក្រហមកម្ពុជា ដែលសម្តេចក្នុងឋានៈជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ឆ្លើយតបនឹងមេរោគអេដស៍/ ជំងឺអេដស៍នៅកម្ពុជា តែងតែដឹកនាំ និងចូលរួមដោយផ្ទាល់ក្នុងការពង្រឹងបណ្តាញកាកបាទក្រហមគ្រប់លំដាប់ថ្នាក់នៅទូទាំងប្រទេស ក្នុងការប្រឆាំងនឹងការ រើសអើងចំពោះអ្នកផ្ទុកមេរោគអេដស៍ ជាពិសេស បានរួមចំណែកទប់ស្កាត់ ការរីករាលដាលមេរោគអេដស៍ និងជំងឺអេដស៍នៅកម្ពុជា ឱ្យកាន់តែមានប្រសិទ្ធភាពមួយកម្រិតបន្ថែមទៀត។   

ឯកឧត្តម វង្សី វិស្សុត បានបញ្ជាក់ថា កម្ពុជាកំពុងតែស្ថិតនៅលើវិថីមួយដែលកំពុងឈានទៅសម្រេចបាននូវ “គោលដៅ៩៥-៩៥-៩៥” នៅត្រឹមឆ្នាំ ២០២៥ ពោលគឺ ៩៥% នៃអ្នកផ្ទុក មេរោគអេដស៍ បានដឹង ពីស្ថានភាពផ្ទុក មេរោគ អេដស៍ របស់ខ្លួន, ៩៥% នៃអ្នក ដែល ដឹងស្ថានភាពផ្ទុក មេរោគអេដស៍ បាន ទទួលការព្យាបាលដោយ ឱសថប្រឆាំង មេរោគអេដស៍ និង ៩៥% នៃអ្នកដែល បាន ទទួល ការព្យាបាលដោយឱសថ ប្រឆាំ ងនឹងមេរោគ អេដស៍ទទួលបានប្រសិទ្ធភាពខ្ពស់ក្នុងការកាត់បន្ថយ ចំនួន មេរោគអេដ ស៍ នៅក្នុងខ្លួន ដែលបានកំណត់ដោយអង្គការ សហ ប្រជាជាតិនៅត្រឹម ឆ្នាំ២០៣០៕ អត្ថបទ ៖ រដ្ឋា