កងទ័ពអាកាសរបស់អ៊ុយក្រែន នៅពីថ្ងៃទី៣០ ខែវិច្ឆិកានេះ បានចេញការព្រមានពីការគំរាមកំហែងពីលើអាកាសសម្រាប់តំបន់ Vinnytsia, Dnipropetrovsk, Zhytomyr, Cherkasy, Kirovohrad, Mykolaiv និងតំបន់ទីក្រុងគីវ ខណៈដែលប្រទេសរុស្ស៊ី បានទម្លាក់ការវាយប្រហារតាមអាកាសពីរលើក ក្នុងគោលបំណងធ្វើឲ្យខូចហេដ្ឋារចនាសម្ព័ន្ធថាមពលរបស់ប្រទេសនេះ។

កាលពីដើមសប្តាហ៍នេះ នៅថ្ងៃទី២៥ ខែវិច្ឆិកា ប្រទេសរុស្ស៊ី បានធ្វើការវាយលុកដោយយានអាកាសគ្មានមនុស្សបើក (UAV)ទ្រង់ទ្រាយធំ នៅពេលយប់ លើទីក្រុងគីវ ដែលអ៊ុយក្រែនភ័យខ្លាចថា នេះគ្រាន់តែជាការចាប់ផ្តើមនៃយុទ្ធនាការរដូវរងា នៅក្នុងអ្វីដែលបានវិវឌ្ឍន៍ ទៅជាសង្រ្គាមបំផ្លិចបំផ្លាញ។

ខណៈដែលរដូវរងា បានឈានចូលមកដល់ លោកប្រធានាធិបតី វ៉ូឡូមៀ ហ្សេឡិនស្គី (Volodymyr Zelensky) បានសារភាពក្នុងអំឡុងពេលដំណើរទស្សនកិច្ចទៅកាន់ទីក្រុងវ៉ាស៊ីនតោន កាលពីដើមរដូវស្លឹកឈើជ្រុះថា រដូវកាលខាងមុខ «នឹងមានការលំបាក» នៅពេលដែលប្រទេសរបស់ខ្លួន បានតស៊ូទប់ទល់នឹងកងកម្លាំងរុស្ស៊ី ខណៈដែលការគាំទ្ររបស់សហរដ្ឋអាមេរិកពីសភា ប្រឈមនឹងភាពមិនច្បាស់លាស់ ដែលនៅកំពុងបន្ត។

ដែនអាកាសរបស់ប្រទេសអ៊ុយក្រែន ត្រូវបានពង្រឹងដោយប្រព័ន្ធការពារដែនអាកាស Gepard ពីទីក្រុងប៊ែរឡាំង និង ប្រព័ន្ធការពារដែនអាកាសចម្ងាយខ្លី Avenger ពីទីក្រុងវ៉ាស៊ីនតោន ដែលមានសមត្ថភាពស្ទាក់ចាប់យានអាកាសគ្មានមនុស្សបើក(UAVs) និងមីស៊ីលតម្រង់គោលដៅ។