យោធាអ៊ីស្រាអែល នៅថ្ងៃព្រហស្បតិ៍ (នៅទី៣០ ខែវិច្ឆិកា) នេះ បាននិយាយថា បទឈប់បាញ់ជាមួយក្រុមហាម៉ាស នឹងបន្ត «ដែលនេះជាពន្លឺនៃកិច្ចប្រឹងប្រែងរបស់អ្នកសម្រុះសម្រួល ដើម្បីបន្តដំណើរការនៃការដោះលែងចំណាប់ថ្នូរនិងចំណុចអាទិភាពនៅក្រោមលក្ខខណ្ឌនៃកិច្ចព្រមព្រៀង»។

ជាការឆ្លើយតប ក្រុមហាម៉ាស បានប្រាប់ថា ខ្លួនយល់ព្រមបន្តបទឈប់បាញ់រយៈពេល ៧ថ្ងៃ។ ការប្រកាសនេះ បានធ្វើឡើងភ្លាមៗ មុនពេលបទឈប់បាញ់ ត្រៀមនឹងផុតកំណត់ បន្ទាប់ពីមានការផ្អាកប្រយុទ្ធរយៈពេល ៦ថ្ងៃ ចំពេលមានការដោះដូរចំណាប់ថ្នូរ ដែលឃុំខ្លួននៅតំបន់ហ្កាហ្សា ជាមួយអ្នកទោសប៉ាឡេស្ទីន។

អ៊ីស្រាអែលបានតាំងចិត្តយ៉ាងមុតមាំថា នឹងកម្ទេចក្រុមហាម៉ាស ដែលគ្រប់គ្រងតំបន់ហ្កាហ្សា ពោលគឺជាការឆ្លើយតបនឹងការវាយប្រហារថ្ងៃទី៧ ខែតុលា ដោយក្រុមសកម្មប្រយុទ្ធនេះ នៅពេលអ៊ីស្រាអែលនិយាយថា ខ្មាន់កាំភ្លើង បានសម្លាប់មនុស្ស ១.២០០ នាក់ និងចាប់ចំណាប់ថ្នូរ ២៤០នាក់។

បើតាមអាជ្ញាធរសុខាភិបាលនៅឆ្នេរសមុទ្រនេះ បានឲ្យដឹងថា នៅមុនមានបទឈប់បាញ់ អ៊ីស្រាអែលបានទម្លាក់គ្រាប់បែកលើដែនដីនេះអស់រយៈពេល ៧សប្តាហ៍ និងបានសម្លាប់ប្រជាជនប៉ាឡេស្ទីនជាង ១៥.០០០នាក់៕