នគរបាលឆ្មាំស៊ីវិល និងសេវាជួយសង្គ្រោះរបស់អេស្ប៉ាញ បាននិយាយកាលពីថ្ងៃពុធ (៣០ វិច្ឆិកា) ថា ជនអន្តោប្រវេសន៍ចំនួន ៤នាក់ បានស្លាប់បន្ទាប់ពីត្រូវបានគេបោះចេញពីទូកល្បឿនលឿនមួយគ្រឿងពីឆ្នេរមួយក្នុងទីក្រុងខាឌីស (Cadiz) ភាគខាងត្បូងប្រទេសអេស្ប៉ាញ។ ទូកនោះបានដឹកជនអន្តោប្រវេសន៍សរុបចំនួន ២៧នាក់ ក្នុងនោះមនុស្ស ២៣នាក់ បានរួចរស់ជីវិត និងទៅដល់អេស្ប៉ាញ។

រូបភាពដែលបានផ្សព្វផ្សាយនៅលើបណ្ដាញសង្គម និងថតដោយប្រព័ន្ធផ្សព្វផ្សាយក្នុងស្រុក បានបង្ហាញទូកល្បឿនដ៏ចាស់មួយគ្រឿង ដែលកំពុងបើកវិលជុំវិញក្នុងសមុទ្រ ហើយមនុស្សនៅលើទូកនោះបានរុញអ្នកជិះទូកផ្សេងទៀតចេញពីលើនោះ ដែលធ្វើឲ្យពួគេចាប់ផ្តើមហែលទឹកដើម្បីរួចរស់ជីវិត។

សាក្សីផ្ទាល់ភ្នែកម្នាក់ បានប្រាប់ទូរទស្សន៍ក្នុងស្រុកថា «យើងឃើញទូកមួយគ្រឿងកំពុងចូលដល់ច្រាំង ប៉ុន្តែពួកគេមិនបានជួញដូរគ្រឿងញៀនទេ តែបានដឹកជនអន្តោប្រវេសន៍មួយចំនួន។ រំពេចនោះ ពួកគេចាប់ផ្តើមលោតទឹក ដោយត្រូវបានបង្ខំឲ្យធ្វើបែបនោះ និងអ្នកខ្លះទៀតត្រូវចាប់បោះចូលទឹក។ មានរូបភាពដែលបង្ហាញពីថៅកែម្នាក់កំពុងកាន់កាំភ្លើងផ្ចង់ទៅកាន់ជនអន្តោប្រវេសន៍ទាំងនោះ ហើយដូចជានិយាយថា បើមិនលោតទឹកទេ យើងនឹងបាញ់អ្នកហើយ»។

ជនអន្តោប្រវេសន៍ ដែលជាបុរសពេញវ័យចំនួនប្រាំបីនាក់ផ្សេងទៀត ត្រូវបានទឹកបោកបក់ទៅលើច្រាំងនៃឆ្នេរ សាំងទី ប៉េទ្រី (Sancti Petri) ក្នុងតំបន់ ឈីក្លាណា (Chiclana) ក្បែរនោះ និងត្រូវបានជួយសង្រ្គោះដោយបុគ្គលិកពេទ្យ និងនគរបាលឆ្មាំស៊ីវិល ហើយមនុស្សបីនាក់ក្នុងចំណោមអ្នកទាំងនោះត្រូវបានបញ្ជូនទៅមន្ទីរពេទ្យ ដោយសារទទួលរងពីអាការៈថយចុះកម្តៅយ៉ាងខ្លាំង៕