ប្រតិភូកម្ពុជាដឹកនាំដោយឯកឧត្តមបណ្ឌិត អ៊ាង សុផល្លែត រដ្ឋមន្រ្ដីក្រសួងបរិស្ថាន បាន​ធ្វើ​ដំណើរ​ទៅចូលរួមកិច្ចប្រជុំ G77 + China ក្នុងក្របខណ្ឌ នៃកិច្ចប្រជុំកំពូលស្តីពីការប្រែប្រួលអាកាសធាតុ នៅទីក្រុងឌូបៃ ។ នាឱកាសនោះឯកឧត្តមបណ្ឌិតរដ្ឋមន្រ្ដី នឹងនាំយកកាដូចំនួន៧ ដែលជាគោល​ជំហរ​របស់​រាជរដ្ឋាភិបាល ក្នុងការឆ្លើយតបនឹងការប្រែប្រួលអាកាសធាតុសកល ប្រកាស​ជូន​COP28​ ៖

១- លុបចោលរោងចក្រអគ្គិសនីក្នុងស្រុកដើរដោយធ្យូងថ្ម៧០០MW ដែល​នឹង​ជំនួស​មក​វិញ​ដោយ​រោង​ចក្រ​អគ្គិសនី​ប្រើ​ដោយLNG។

២-អភិវឌ្ឍថ្មីនូវទំនប់ស្តុកទឹក ដើម្បីផលិតថាមពលអគ្គិសនីស្អាត ១០០០MW ឱ្យ​បាន​មុន​ឆ្នាំ​២០២៨​។

៣-បង្កើនថាមពលកកើតឡើងវិញ ដែលភាគច្រើនជាថាមពលពន្លឺព្រះអាទិត្យ ថាមពល​វារី​អគ្គិសនី និងថាមពលខ្យល់ ឱ្យបានដល់កម្រិត៧០ភាគរយ។

៤-មិនសាងសង់ទំនប់វារីអគ្គិសនីកាត់ទន្លេមេគង្គ។

៥-បន្តមិនអនុញ្ញាតឱ្យបង្កើតរោងចក្រផលិតអគ្គិសនីប្រើដោយធ្យូងថ្មនៅកម្ពុជា។

៦-កាត់បន្ថយការបំពុលដោយថង់ប្លាស្ទិក ដែលមានប្រជាពលរដ្ឋកម្ពុជាជាង៣លាននាក់ បាន​ប្តេជ្ញា​ចិត្ត​កាត់បន្ថយការប្រើប្រាស់ថង់ប្លាស្ទិក ព្រមទាំង​ពង្រីក​ចលនា​នេះ​ឱ្យ​បាន​ទូលំទូលាយ និង​ឱ្យ​ក្លាយ​ទៅជាទន្លាប់។

៧-ពង្រីកវិសាលភាពគម្របព្រៃឈើឱ្យបាន ៦០% នៅឆ្នាំ២០៥០ តាមរយៈ​ការ​ដាំដើម​ឈើ​ឱ្យ​បាន​យ៉ាង​តិច ១លានដើមក្នុង១ឆ្នាំ និងការពង្រឹងការគ្រប់គ្រងតំបន់ការពារធម្មជាតិ៕