ថ្ងៃទី១ ខែធ្នូ ឆ្នាំ២០២៣នេះ រដ្ឋបាលខេត្តកែប បានកំពុងចាប់ផ្តើមរៀបចំ​បុណ្យ​សមុទ្រ​តាម​ការ​គ្រោង​ទុក​របស់ខ្លួន ខណៈជុំទីបីដែលកែបធ្វើជាម្ចាស់ផ្ទះនេះ ក្រោមប្រធានបទ «ទាំងអស់គ្នាដើម្បីទេសចរណ៍»នឹងនាំមកនូវព្រឹត្តិការណ៍កំសាន្ត ត និង​ទាក់​ទាញ​ដល់ភ្ញៀវទេសចរជាតិ និងអន្តរជាតិជាច្រើន តាមរយៈការរៀបចំស្តង់លក់ផលិតផល ស្តង់​ម្ហូប​អាហារ ព្រឹត្តិការណ៍តន្រ្តី និងព្រឹត្តិការណ៍នៃការប្រកួតកីឡាជាច្រើនប្រភេទជាដើម។

បុណ្យសមុទ្រជុំទី៣ លើកទី១០នេះ បានកំពុងប្រព្រឹត្តទៅចាប់ពីថ្ងៃទី១នេះដល់ថ្ងៃទី៣ ខែធ្នូ ឆ្នាំ២០២៣ នៅ​លើទឹកដីខេត្តខែប។ បុណ្យដែល​មាន​លក្ខណៈ​ប្តូរវេន​សម្រាប់​ខេត្ត​ជាប់​សមុទ្រ​នៅ​ទិស​ភាគ​នារតីនេះមិនត្រឹមតែរួមចំណែកក្នុងការផ្សព្វផ្សាយអំពីសក្តានុពលទេសចរណ៍ អំពីឆ្នេរ​ធម្មជាតិ​របស់ខេត្តដែលជាប់ឆ្នេរសមុទ្រនីមួយៗនៅកម្ពុជាប៉ុណ្ណោះទេ ថែមទាំងបា​ន​ចូល​រួម​គាំទ្រ​គោល​នយោបាយរបស់រាជរដ្ឋាភិបាលកម្ពុជា ក្នុងការយកចិត្ត​ទុក​ដាក់​អភិវឌ្ឍន៍​វិស័យ​ទេសចរណ៍​ប្រកប​ដោយ​និរន្តរភាព និងការទទួលខុសត្រូវផងដែរ។

លោក ហេង យ័ន អភិបាលក្រុងកែប បានប្រាប់ទូរទស្សន៍BTVថា បុណ្យសមុទ្រឆ្នាំនេះ នឹង​ធ្វើ​ឲ្យ​ភ្ញៀវ​ទេសចរជាតិ និងអន្តរ​ជាតិ​កាន់​តែ​សម្បូរ​បែប​ក្នុង​ចក្ខុ​អារម្មណ៍ជាមួយ​នឹង​ការរៀប​ចំ​ការ​ប្រគំ ​តន្រ្តី​​សម័យជាច្រើនកន្លែង ការប្រកួតកីឡាប្រដាល់គុនខ្មែរ ការបង្ហោះខ្លែង​ដោយ​ភ្ជាប់​ជា​មួយ​ភ្លើងពណ៌ និងព្រឹត្តិការណ៍កំសាន្តជាច្រើនទៀតទាំងតាមបែបបុរាណ និងសម័យ។ មួយវិ​ញ​ទៀ​ត​ការ​រៀបចំនូវហេដ្ឋារចនាសម្ព័ន្ធ,ឆ្នេរសមុទ្រ ដែលទើបរៀបចំថ្មីៗ, វត្តមានដ៏​ប្រណិត​របស់​សណ្ឋាគារ, រីសត, ទីកន្លែងអង្គុយកំសាន្តស្រូបយកខ្យល់អាកាសជាច្រើនទៀត រួមទាំង​ការ​លក់​ម្ហូប​អាហារ​សមុទ្រ​ស្រស់ៗ​ដែល​ទើប​យក​ចេញ​ពី​សមុទ្រ​ពី​សំណាក់​បង​ប្អូន​ប្រជា​នេសាទ​ភ្លាម​ៗជា​ដើ​ម​ផងដែរ។

បើតាមអភិបាលក្រុងកែបរូបនេះក៏បានលើកឡើងផងដែរថាការដែលខេត្តកែប ត្រូវ​បាន​អនុញ្ញាត​ឲ្យ​ធ្វើ​ជា​ម្ចាស់​ផ្ទះនូ​វបុ​ណ្យស​មុទ្រ​ឆ្នាំ​២០២៣នេះ គឺ​បាន​កើត​ចេញ​ពី​ការ​អភិវឌ្ឍ​រីក​ចម្រើន​របស់​ខេត្ត ក្រោមម្លប់សុខសន្តិភាព និងស្ថិរភាពនយោបាយ ដែលដឹកនាំដោយរាជរដ្ឋាភិបាល ដោយ​មាន​សម្តេចធិបតី ហ៊ុន ម៉ាណែត ជានាយករដ្ឋមន្រ្តីជា។

សូមបញ្ជាក់ថា បុណ្យសមុទ្រជុំទី៣លើកទី១០ឆ្នាំ២០២៣នេះ នឹងប្រព្រឹត្តទៅក្រោមអធិបតីភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងវត្តមានមន្រ្តីជាន់ខ្ពស់រាជរដ្ឋាភិបាលជាច្រើន រួមទាំងបណ្តាអង្គទូតនានាប្រចាំនៅកម្ពុជាផងដែរ៕ អត្ថបទ៖ បាន ចក់