ក្នុងដំណើរទស្សនកិច្ចលើកទី៣របស់រដ្ឋមន្ត្រីការបរទេសអាមេរិកលោក Antony Blinken កាលពីថ្ងៃព្រហស្បតិ៍ ទី ៣០ វិច្ឆិកា បានជំរុញឱ្យអ៊ីស្រាអែលបង្កើតតំបន់សុវត្ថិភាពសម្រាប់ជនស៊ីវិលប៉ាឡេស្ទីននៅតំបន់ហ្កាហ្សា មុនពេលប្រទេសនេះបន្តប្រតិបត្តិការយោធាធំៗ នៅក្នុងដែនដី ដែលគ្រប់គ្រងដោយក្រុមហាម៉ាស។

ថ្លែងនៅថ្ងៃទី៧នៃការផ្អាកប្រយុទ្ធគ្នារវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ហាម៉ាស លោក Blinken ក៏បានអំពាវនាវ ផងដែរ ឱ្យមានការពន្យារពេលនៃបទឈប់បាញ់បន្ថែមទៀត ដែលរួមមានការដោះដូរចំណាប់ខ្មាំង និងអ្នកទោស និងការបញ្ជូនជំនួយទៅកាន់តំបន់ហ្កាហ្សាដែលត្រូវបានឡោមព័ទ្ធដោយអ៊ីស្រាអែល។

ប្រមុខការទូតអាមេរិករូបនេះ បានប្រាប់ក្រុមអ្នកសារព័ត៌មាននៅទីក្រុង Tel Aviv នៅចុងបញ្ចប់នៃដំណើរទស្សនកិច្ចទៅកាន់អ៊ីស្រាអែល និងតំបន់ West Bank គ្រប់គ្រងដោយអ៊ីស្រាអែលថា ច្បាស់ ណាស់ថា យើងចង់ឃើញដំណើរការនេះបន្តទៅមុខ។ លោកបាននិយាយថា យើងចង់បានថ្ងៃទី៨និងលើសពីនេះទៀត ។

ការផ្អាកប្រយុទ្ធគ្នារយៈពេលខ្លីនេះត្រូវផុតកំណត់នៅព្រឹកថ្ងៃសុក្រសប្ដាហ៍នេះ លុះត្រាតែមានកិច្ចព្រមព្រៀងដើម្បីបន្តត្រូវបានសម្រេច ដែលបានអនុញ្ញាតឱ្យមានការដោះលែងចំណាប់ថ្នូរអ៊ីស្រាអែល និងចំណាប់ខ្មាំងបរទេសជាច្រើននាក់ដែលត្រូវបានក្រុមហាម៉ាសចាប់នៅក្នុងការវាយឆ្មក់ដ៏សាហាវ លើអ៊ីស្រាអែលភាគខាងត្បូងជាថ្នូរនឹងការដោះលែងអ្នកទោសប៉ាឡេស្ទីន៕