កិច្ចប្រជុំកំពូលអាកាសធាតុរបស់អង្គការសហប្រជាជាតិ ទទួលបានជោគជ័យយ៉ាងឆាប់រហ័សកាលពីថ្ងៃព្រហស្បតិ៍ (៣០ វិច្ឆិកា) ដោយគណៈប្រតិភូបានអនុម័តមូលនិធិថ្មីដើម្បីជួយបណ្ដាប្រទេសដែលងាយរងគ្រោះ ទប់ទល់នឹងការចំណាយនៃគ្រោះមហន្តរាយអាកាសធាតុ។ កិច្ចព្រមព្រៀងនេះត្រូវបានអនុម័តបន្ទាប់ពីពិធីបើកកិចប្រជុំកំពូល COP28 នៅទីក្រុងឌុយបៃ ហើយបន្ទាប់ពីមានការចរចាជាច្រើនខែរួចមកហើយ។

ប៉ុន្តែអ្នកខ្លះបារម្ភថានៅតែមានបញ្ហាដែលមិនអាចដោះស្រាយបាន រួមទាំងរបៀបដែលមូលនិធិនឹងត្រូវផ្តល់ហិរញ្ញប្បទាននៅពេលអនាគត។ របកគំហើញដំបូងលើមូលនិធិ ដែលបណ្ដាប្រទេសក្រីក្របានទាមទារអស់ជាច្រើនឆ្នាំមកហើយនេះ អាចជួយកាត់បន្ថយភាពតានតឹងដល់ការសម្របសម្រួលផ្សេងទៀត។

នៅមុននោះ ប្រធានកិច្ចប្រជុំ COP28 លោក ស៊ុលតាន អាល់ចាប៊ឺ (Sultan al-Jaber) និងជានាយកប្រតិបត្តិនៃក្រុមហ៊ុនប្រេងជាតិរបស់អារ៉ាប់រួម បានបើកកិច្ចប្រជុំកំពូលនេះដោយជំរុញឱ្យបណ្តាប្រទេស និងក្រុមហ៊ុនឥន្ធនៈហ្វូស៊ីល ធ្វើការរួមគ្នាដើម្បីសម្រេចបាននូវគោលដៅអាកាសធាតុពិភពលោក។

ក្នុងរយៈពេលពីរសប្តាហ៍ខាងមុខ បណ្ដារដ្ឋាភិបាលក៏នឹងពិភាក្សាគ្នាថាតើត្រូវយល់ព្រមជាលើកដំបូង ដើម្បីបញ្ឈប់ការប្រើប្រាស់ធ្យូងថ្ម ប្រេង និងឧស្ម័នដែលបញ្ចេញឧស្ម័នកាបូនឌីអុកស៊ីត ជាសកល ដែលជាប្រភពចម្បងនៃការបំភាយឧស្ម័ន ឬយ៉ាងណា។ របៀបវារៈនៅក្នុងកិច្ចប្រជុំកំពូលអាកាសធាតុមួយនេះ ត្រូវបានគេស្គាល់ថា «ការវាយតម្លៃសកល» ហើយនោះគឺជាពេលវេលាដែលប្រទេសនានាវាយតម្លៃវឌ្ឍនភាពរបស់ពួកគេក្នុងការសម្រេចបាននូវគោលដៅអាកាសធាតុសកល៕