នៅថ្ងៃទី១ ខែធ្នូនេះ បណ្តាវិទ្យាល័យនានា នៅខេត្តកណ្តាល ក៏បានរៀបចំកម្មវិធី​បើក​បវេសន​កាល​ឆ្នាំសិក្សាថ្មី ឆ្នាំ២០២៣ ឆ្នាំ២០២៤ ក្នុងឱកាសនេះ លោកគ្រូអ្នកគ្រូបង្រៀន បាន​បង្ហាញ​តាំង​ចិត្ត​លើការស្វែងរកវិធីសាស្ត្រថ្មីល្អៗបន្ថែមទៀត ដើម្បីបង្ហាត់បង្រៀនសិស្សឲ្យរៀនពូកែ និង​ប្រឡងទទួលបាននិទេ្ទសល្អៗនាពេលខាងមុខ។

នៅក្នុងឱកាសអញ្ជើញចូលរួមបើកបវេសនកាលនៅវិទ្យាល័យ ហ៊ុន សែន តាខ្មៅ ក្រុងតាខ្មៅ លោក​គ្រូអ្នកគ្រូបង្រៀន បានប្ដេជ្ញាចិត្តធ្វើជាឪពុកម្តាយទីពីររបស់សិស្សឲ្យល្អបំផុត និងខិត​ខំ​រិះរក​វិធី​សាស្ត្រ​បង្រៀនថ្មីៗបន្ថែមឲ្យបានជាច្រើន យកទៅបង្រៀនធ្វើឲ្យសិស្សងាយយល់ ងាយចំា មាន​ចំណេះដឹងល្អ។

ចំណែកសិស្សានុសិស្សដែលត្រូវចូលឆ្នាំសិក្សាថ្មីថ្នាក់ទី ១២ បានលើកឡើងថា នៅក្នុង​ឆ្នាំ​សិក្សា​ថ្មី​នេះ ពួកគេទាំងអស់គ្នានឹងខិតខំប្រឹងប្រែងស្រាវជ្រាវរៀនសូត្រ ប្រកាន់ខ្ជាប់សីលធម៌ល្អ និង​ខិតខំ​ប្រឡង​យក​និទ្ទេសល្អជូនខ្លួនឯង ជូនឱពុកម្តាយ ជូនសាលា។

សូមជម្រាបថា ក្នុងឱកាសថ្ងៃបើកបវេសនកាលថ្មីនេះ សម្តេចធិបតី ហ៊ុន ម៉ាណែត ក៏បាន​ស្នើ​មាតាបិតា អាណាព្យាបាលសិស្សគ្រប់រូប ចូលរួមតាមដាន លទ្ធផលការសិក្សា អត្តចរឹក សីលធម៌ សុជីវធម៌ របស់កូនទាំងនៅក្នុងគ្រួសារ ក្នុងសាលារៀន និងសហគមន៍ ព្រមទាំងជួយបង្រៀនកូន និង​បង្កលក្ខណៈឲ្យកូនរៀននៅក្នុងផ្ទះឲ្យបានច្រើនថែមទៀត៕ អត្ថបទ ស៊ុម សុខជា