ថ្ងៃទី១ ខែធ្នូ ឆ្នាំ២០២៣ ជាថ្ងៃបើកបវេសនកាលឆ្នាំសិក្សាថ្មី ២០២៣-២០២៤ សម្រាប់​គ្រឹះស្ថាន​សិក្សា​សាធារណៈទូទាំងប្រទេស ចាប់ពីមតេយ្យសិក្សា រហូតដល់ថ្នាក់វិទ្យាល័យ ខណៈក្នុងឱកាស​នេះ​គ្រឹះស្ថាន​សិក្សាបានរម្លឹកជាថ្មីអំពីច្បាប់វិន័យក្នុងសាលា និងបញ្ជាក់ពីគោលដៅ​ពង្រឹង​គុណ​ភាព​អប់រំ ដើម្បីទទួលបានលទ្ធផលប្រសើរនៅចុងឆ្នាំសិក្សា។

ក្នុងថ្ងៃបើកបវេសនកាលនេះ វិទ្យាល័យបាក់ទូក បានប្រើប្រាស់ប្រព័ន្ធឃោសនាស័ព្ទ ប្រកាស​បញ្ជាក់​លម្អិត​ពី​ច្បាប់​វិន័យ​របស់សាលា ក៏ដូចជាគោលដៅរបស់សាលា​ក្នុង​ការ​ពង្រឹង​គុណភាព​អប់រំ ដើម្បឈានទៅការទទួលបានលទ្ធផលប្រសើរនៅចុងឆ្នាំសិក្សា។

លោក តូច កន្តាល់ នាយក វិទ្យាល័យបាក់ទូក បានបញ្ជាក់ថា ច្បាប់វិន័យរបស់សាលា រាប់​បញ្ចូល​ទាំង​ការ​ស្លៀកពាក់ឱ្យបានត្រឹមត្រូវ ការមកសិក្សាឱ្យបានទៀតទាត់ ការសម្អាតបរិស្ថាន ប្រកាន់​ខ្ជាប់​អនាម័យ។ លោកបន្តថា ក្នុងឱកាសឆ្នាំសិក្សាថ្មីនេះ សាលារៀននឹងស្វែងរកវិធីសាស្ត្រថ្មី បំពេញ​ចន្លោះខ្វះខាត ពិសេសសម្រាប់សិស្សថ្នាក់ទី១២ ដើម្បីឱ្យ​អាត្រា​សិស្ស ប្រឡង​ជាប់​មាន​ការ​កើន​ឡើង​។

ក្នុងឱកាស​ចាប់ផ្ដើមការសិក្សាឆ្នាំថ្មីនេះដែរសិស្សានុសិស្សបានលើកឡើងពីការប្ដេជ្ញា ប្រឹងប្រែង​រៀន​សូត្រ គោរពវិន័យសាលាឱ្យបានល្អផងដែរ។ ពួកគេសន្យា ធ្វើជាកូនល្អ សិស្សល្អ ពលរដ្ឋល្អ ប្រឹ​ងប្រែង​រៀនសូត្រ ដើម្បីខ្លួនឯង គ្រួសារ សាលារៀន ក៏ដូចជាសង្គមជាតិទាំងមូល។

សូមជម្រាបថាការបើកបវេសនកាលឆ្នាំសិក្សា ២០២៣-២០២៤ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានចេញសារលិខិត បញ្ជាក់ដែរថា ថ្ងៃទី១ ខែធ្នូ ឆ្នាំ២០២៣ ក៏​អាច​ចាត់​ទុក​ជា​ថ្ងៃ​ដំបូង ដែលរាជរដ្ឋាភិបាល នីតិកាលទី៧ ចាប់ផ្តើម​អនុវត្ត​អាទិភាព​​គោល​នយោបាយ​សំខាន់​ៗ ពាក់ព័ន្ធនឹងវិស័យអប់រំផងដែរ៕ អត្ថបទ៖ គឹមហុក