ទីក្រុងញ៉ូវដែលី របស់ឥណ្ឌា ត្រូវបានគ្របដណ្តប់ដោយផ្សែងអ័ព្ទយ៉ាងក្រាស់នៅព្រឹកថ្ងៃសុក្រ (០១ ធ្នូ) ខណៈដែលរដ្ឋធានីរបស់ប្រទេសឥណ្ឌាមួយនេះនៅតែបន្តរងគ្រោះពីកង្វក់ខ្យល់យ៉ាងខ្លាំង។

វីដេអូដ្រូនមួយបានបង្ហាញពីផ្លូវក្នុងទីក្រុងដ៏លេចធ្លោ និងទីតាំងសំខាន់ៗ ដែលអាចមើលឃើញគ្របដណ្ដប់ដោយផ្សែងអ័ព្ទដ៏ក្រាស់។ អ្នកស្រុកម្នាក់បាននិយាយថា វាមានអារម្មណ៍ដូចជាមនុស្សម្នាក់កំពុងជក់បារីជាប់រហូតនៅជុំវិញខ្លួន ហើយដូចជាផ្សែងនោះកំពុងហុយទៅលើមុខរបស់គេ។

ទីក្រុងញ៉ូវដែលី ត្រូវបានចាត់ថ្នាក់ដោយទីភ្នាក់ងារគុណភាពខ្យល់ស្វីស IQAir ថាជាទីក្រុងដែលមានកង្វក់ខ្យល់ខ្លាំងបំផុតរបស់ពិភពលោក គិតត្រឹមម៉ោង ០៦:០០ (ម៉ោងសកល)។ រដ្ឋធានីឥណ្ឌាមានសន្ទស្សន៍គុណភាពខ្យល់ (AQI) កម្រិត៤៨៤ ដោយធ្វើឲ្យវាស្ថិតនៅក្នុងប្រភេទ «គ្រោះថ្នាក់»។

គុណភាពខ្យល់ក្នុងទីក្រុង ញ៉ូវដេលី កាន់តែយ៉ាប់យ៉ឺនជារៀងរាល់ឆ្នាំ មុនពេលរដូវរងា នៅពេលដែលខ្យល់ត្រជាក់បានហ៊ុមព័ទ្ធការបំពុលពីប្រភពបង្កផ្សែងកង្វក់នានា រួមមានយានយន្ត ឧស្សាហកម្ម ធូលីសំណង់ និងការដុតកាកសំណល់កសិកម្មជាដើម៕