ស្ទឹងត្រែង៖ សត្វផ្សោតញីដ៏ធំ ១ក្បាល មានទំងន់ជិត២០០គីឡូក្រាមបានស្លាប់នៅក្នុងអន្លង់ផ្សោតអូឈើទាលជាកន្លែងតំបន់រមណីយដ្ឋានទេសចរណ៍រ ស្ថិតនៅភូមិ ឃុំព្រះរំកិល ស្រុកបុរីអូរស្វាយសែនជ័យខេត្តស្ទឹងត្រែង  ករណីនេះប្រជាសហគមន៍ទេសចរណ៏នាំគ្នាសោគស្តាយ ព្រោះវាបាត់បង់សត្វផ្សោតមេពូជអាចធ្វើឱ្យមានការថមថយបរិមាណសត្វផ្សោតនិងអាចបាត់បង់ក្នុងពេលដ៍ឆាប់ខាងមុខនេះ។  

ក្នុងសកម្មភាពត្រួតពិនិត្យសំណាកត្រីផ្សោតដែលបានស្លាប់អណ្តែតទឹកកាលពីថ្ងៃទី១៤ ខែមិថុនា ឆ្នាំ២០២១នេះ លោក ដនបាន់ ឆ្មាំទន្លេប្រចាំការនៅឃុំព្រះរំកិលខេត្តស្ទឹងត្រែង បានបញ្ជាក់ថា៖តាមការពិនិត្យជាក់ស្ដែង ត្រីផ្សោតដ៏ធំមួយក្បាលនេះ វាទើបតែស្លាប់ថ្មីៗអាចរងផលប៉ះពាល់ពីអ្នកលួចលាក់ធ្វើនេសាទខុសច្បាប់នៅពេលយប់។ 

លោកអះអាងថា សត្វផ្សោតញីមួយក្បាលនេះ វារស់នៅក្នុងអន្លង់ផ្សោតអូរឈើទាលកន្លែងតំបន់ទេសចរណ៏ផ្សោតព្រះរំកិល ដែលមានទំងន់ប្រមាណជិត ២០០ គីឡូក្រាម និងមានប្រវែងជាង២ម៉ែត្របច្ចុប្បន្ន ក្រុមមន្ត្រីជំនាញ របស់រដ្ឋបាលជលផលខេត្ត និងបុគ្គលិកអង្គការWWF បានធ្វើសំណាកទៅតាមបច្ចេកទេសទាក់ទងទៅនិងការស្លាប់របស់សត្វផ្សោតនេះ និងយកទៅរក្សាទុកដើម្បីធ្វើពិសោធន៍រកហេតុផលនៃការស្លាប់នេះ។

លោកផយវណ្ណា មន្ត្រីសហគមន៏ទេសចរណ៏នៅតំបន់ផ្សោតព្រះរំកិលនេះ បានបញ្ជាក់ថា កាលពី២ខែមុនសត្វផ្សោតបានស្លាប់មួយរួចមកហើយ ចំណែកខាង (អង្គការ WWF)យកសំណាកត្រីផ្សោតទៅពិនិត្យរកមូលហេតុ តែមិនបានចេញជាលទ្ធផលយ៉ាងនោះទេហើយយុទ្ធសាស្ត្រការការពារមិនទាន់មានដែរ។

លោកស្នើឱ្យមន្ត្រីជំនាញពាក់ព័ន្ធទាំងអស់រិះរកយន្តការធ្វើការអភិរក្សឱ្យមានប្រសិទ្ធភាពនិងកុំទំលាក់កំហុសទៅលើអាកាសធាតុប្រែប្រួល ព្រោះមានករណីខ្លះក៍សត្វផ្សោតនេះស្លាប់ដោយសារតែបទល្មើសនេសាទតែប៉ុណ្ណោះ។

សូមបញ្ចាក់ថា នេះជាការស្លាប់ត្រីផ្សោតទី៣ហើយ នៅខេត្តស្ទឹងត្រែងក្នុងឆ្នាំ២០២១នេះ ព្រោះកាលបិថ្ងៃទី២៣មេសាក៏មានសត្វផ្សោតញី១ក្បាល់ទំងន់ជាង១រយគីឡូក្រាម បានស្លាប់រួចមកហើយដែរ។

ហើយការស្លាប់លើកនេះ ត្រូវបានប្រជាពលរដ្ឋប្រទះឃើញ ស្ថិតនៅចំណុច(កោះកក)ក្នុងភូមិសាស្ត្រទឹកដីភូមិក្រោមតាមដងទន្លេមរគង្គ ឃុំព្រះរំកិលស្រុកបុរីអូស្វាយសែនជ័យខេត្តស្ទឹងត្រែង៕