បន្ទាប់ពីបានធ្វើទស្សនកិច្ចទៅកាន់ដែនដីប៉ាឡេស្ទីន ប្រធានអង្គការអន្តរជាតិគ្រូពេទ្យគ្មានព្រំដែន (Médecins Sans Frontières) លោក Christos Christou បានពណ៌នាស្ថានភាព នៅតំបន់ហ្កាហ្សាថាជាមហន្តរាយ ដោយលោកបានថ្លែងបែបនេះ អំឡុងពេលធ្វើសន្និសីទសារព័ត៌មាន ក្នុងរដ្ឋធានី Amman ប្រទេសហ្ស៊កដានី កាលពីថ្ងៃព្រហស្បតិ៍ (ទី៣០ ខែវិច្ឆិកា)។

លោក Christos Christou បាននិយាយថា៖ «មនុស្សម្នាព្យាយាមរត់គេចពីការទម្លាក់គ្រាប់បែក ដែលមិនអាចទាយទុកជាមុនបាន ដោយព្យាយាមស្វែងរកសុវត្ថិភាព នៅកន្លែង ដែលគ្មានសុវត្ថិភាព។ ហើយឥឡូវនេះ មនុស្សជាង ១,៧លាននាក់ ត្រូវបានផ្លាស់ទីលំនៅ ហើយពួកគេកំពុងរស់នៅក្នុងស្ថានភាពដ៏ណែនណាន់តាន់តាប់ វឹកវរ និងគួរឲ្យរន្ធត់។ នេះគឺរឿងមិនអាចប៉ាន់ស្មានបានទាល់តែសោះ។ នេះគឺស្ថានភាពអមនុស្សធម៌»។

សូមបញ្ជាក់ថា ការឈានដល់បទឈប់បាញ់ រវាងអ៊ីស្រាអែល និងក្រុមហាម៉ាស ដែលត្រូវបានធ្វើឡើងដោយមានការព្រមព្រៀងដោះលែងចំណាប់ថ្នូរ និងអ្នកទោស បានអនុញ្ញាតឲ្យមានជំនួយបន្ថែមទៀតចូលទៅក្នុងតំបន់ហ្កាហ្សា ក្នុងរយៈពេល ៦ថ្ងៃកន្លងមកនេះ។ តែបុគ្គលិកផ្ដល់ជំនួយ និយាយថា ជំនួយដែលរួមមានអាហារ ទឹក គ្រឿងផ្គត់ផ្គង់វេជ្ជសាស្ត្រ និងប្រេងឥន្ធនៈ នៅមានកម្រិតទាបជាងអ្វី ដែលត្រូវការ៕

បណ្ដាមន្ត្រី និងបុគ្គលិកជំនួយ បានឲ្យដឹងថា នៅមុននេះ ព្រះមហាក្សត្រ Abdullah របស់ប្រទេសហ្ស៊កដានី បានជំរុញឲ្យមន្ត្រីជំនួយរបស់អង្គការសហប្រជាជាតិ និងអង្គការក្រៅរដ្ឋាភិបាលអន្តរជាតិនានា ដាក់សម្ពាធលើអ៊ីស្រាអែល ដើម្បីអនុញ្ញាតឲ្យមានជំនួយបន្ថែមទៀតចូលទៅក្នុងតំបន់ហ៊ុមព័ទ្ធហ្កាហ្សា ដែលស្ថានភាពមនុស្សធម៌កាន់តែអាក្រក់ទៅៗ៕