អង្គភាពស៊ើបអង្កេតពីសេដ្ឋកិច្ច ឬ EIU កាលពីថ្ងៃព្រហស្បតិ៍ (ទី៣០ ខែវិច្ឆិកា) បានឲ្យដឹងថា ប្រទេសសិង្ហបុរី និងទីក្រុង Zurich របស់ប្រទេសស្វីស បានជាប់ឈ្មោះជាទីក្រុង ដែលមានការចំណាយថ្លៃជាងគេបំផុតរបស់ពិភពលោក នៅឆ្នាំនេះ ដែលតាមមកដោយទីក្រុងហ្សឺណែវ (ស្វីស) ទីក្រុងញូវយ៉ក (សហរដ្ឋអាមេរិក) និងទីក្រុងហុងកុង (ចិន)។

អង្គភាពនេះ បានឲ្យដឹងក្នុងរបាយការណ៍ថា ជាមធ្យម តម្លៃបានកើនឡើងប្រចាំឆ្នាំ ៧,៤ភាគរយ ក្នុងលក្ខខណ្ឌរូបិយប័ណ្ណក្នុងស្រុក សម្រាប់ទំនិញ និងសេវាកម្មដែលប្រើជាទូទៅជាង ២០០មុខ ដោយធ្លាក់ចុះពីការកើនឡើង ៨,១ភាគរយ កាលពីឆ្នាំមុន ប៉ុន្តែនៅតែ «ខ្ពស់ជាងនិន្នាការ ក្នុងឆ្នាំ ២០១៧-២០២១»។

សិង្ហបុរីទទួលបានចំណាត់ថ្នាក់លើគេជាលើកទី៩ ក្នុងរយៈពេល ១១ឆ្នាំចុងក្រោយនេះ ដោយសារកម្រិតតម្លៃខ្ពស់ ក្នុងប្រភេទទំនិញជាច្រើន។ រដ្ឋទីក្រុងតែមួយនេះ មានតម្លៃដឹកជញ្ជូនខ្ពស់បំផុតរបស់ពិភពលោក ដោយសារការគ្រប់គ្រងយ៉ាងតឹងរ៉ឹងរបស់រដ្ឋាភិបាលលើចំនួនរថយន្ត។ ប្រទេសនេះក៏ស្ថិតក្នុងចំណោមទីកន្លែង ដែលមានតម្លៃថ្លៃបំផុតផងដែរ សម្រាប់ការទិញសម្លៀកបំពាក់ គ្រឿងទេស និងគ្រឿងស្រវឹង។

អង្គភាពបានបន្ថែមថា ការឡើងចំណាត់ថ្នាក់របស់ទីក្រុង Zurich បានឆ្លុះបញ្ចាំងពីភាពរឹងមាំនៃប្រាក់ហ្វ្រង់ស្វីស និងការឡើងថ្លៃខ្ពស់ សម្រាប់តម្លៃគ្រឿងទេស ទំនិញប្រើប្រាស់ក្នុងផ្ទះ និងការកម្សាន្ត។ ចំណែកទីក្រុងហ្សឺណែវ និងញូវយ៉ក ជាប់ចំណាត់ថ្នាក់លេខ៣ ខណៈទីក្រុងហុងកុងស្ថិតនៅលេខ៥ ហើយទីក្រុង Los Angeles (សហរដ្ឋអាមេរិក) លេខ៦៕