តំណាងរាស្រ្តអាមេរិក លោក George Santos ដែលរងការចោទប្រកាន់ កាលពីថ្ងៃព្រហស្បតិ៍ (ទី៣០ ខែវិច្ឆិកា) បានបង្ហាញនូវភាពមិនព្រមចុះញ៉ម នៅមុនមានការបោះឆ្នោតដែលរំពឹងថា នឹងដករូបលោកចេញពីសភា ហើយលោកបានរិះគន់សមាជិកសភាផ្សេងទៀត ពោលគឺអ្វី ដែលអាចជាការនិយាយថ្ងៃចុងក្រោយរបស់លោកនៅវិមានរដ្ឋសភា Capitol Hill។

សមាជិកសភាអាណត្តិទី១ វ័យ ៣៥ឆ្នាំ ដែលបានចំណាយពេលមិនដល់ ១ឆ្នាំ នៅក្នុងសភា ប្រឈមនឹងការចោទប្រកាន់ហិរញ្ញវត្ថុយុទ្ធនាការព្រហ្មទណ្ឌ ហើយបានទទួលស្គាល់ថា បានប្រឌិតជីវប្រវត្តិរបស់ខ្លួនជាច្រើន។ សមាជិកនៃគណបក្សសាធារណរដ្ឋរបស់លោក បានកំណត់ពេលបោះឆ្នោតលើការដកលោកចេញនៅថ្ងៃសុក្រ (ទី១ ខែធ្នូ) នេះ។

អំឡុងការពិភាក្សាដេញដោលរយៈពេល ១ម៉ោង លោក Santos មានការចូលរួមការពារពីសំណាក់សមាជិកគណបក្សសាធារណរដ្ឋ ៣រូប ដែលភាគច្រើនបានប្រកែកតវ៉ាប្រឆាំងនឹងការដកចេញនេះ ដោយផ្អែកលើមូលដ្ឋាននីតិវិធី។ សមាជិកគណបក្សប្រជាធិបតេយ្យ និងគណបក្សសាធារណរដ្ឋចំនួន ៨នាក់ បានអំពាវនាវឲ្យដកលោក Santos ចេញ។

សូមបញ្ជាក់ថា លោក Santos បានរួចផុតពីការបោះឆ្នោតដកចេញ កាលពីដើមខែនេះ ប៉ុន្តែប្រឈមនឹងឱកាសរួចខ្លួនតិចណាស់ នាពេលនេះ។ ការស៊ើបអង្កេតរបស់សមាជិកសភានៃគណបក្សទាំង២ ដែលបានចេញផ្សាយ បន្ទាប់ពីការបោះឆ្នោតនោះ បានរកឃើញភស្តុតាងដែលបង្ហាញថា លោកបានចំណាយប្រាក់យុទ្ធនាការលើការចាក់ថ្នាំ Botox (ថ្នាំបំបាត់ស្នាមជ្រួញ) សម្ភារប្រើប្រាស់ម៉ាកប្រណីត ដូចជា Hermes និងចំណាយលើការមើលវេបសាយ OnlyFans ជាវេទិកាអនឡាញ ដែលគេស្គាល់ថា ជាមាតិកាទាក់ទងនឹងផ្លូវភេទ៕