ប៊ែលហ្សិក៖ ក្រុមមេដឹកនាំសម្ព័ន្ធ NATO បានប្ដេជ្ញាកាលពីថ្ងៃចន្ទ ធ្វើការរួមគ្នាប្រឆាំងនឹងការប្រឈមជាប្រព័ន្ធបង្កឡើង ដោយគោលនយោបាយគំរាមកំហែងរបស់ប្រទេសចិន និងព្រមានប្រទេសរុស្ស៊ីអំពីការបំពានច្បាប់អន្តរជាតិ។
ខណៈលោកប្រធានាធិបតីអាមេរិក Joe Biden រម្លឹកឡើងវិញពីទំនាក់ទំនងអន្តរអាត្លង់ទិក នៅឯជំនួបកំពូលលើកដំបូងរបស់លោក ជាមួយបណ្ដាសម្ព័ន្ធមិត្តលោកខាងលិច ក្រុមមេដឹកនាំបានចេញសេចក្ដីថ្លែងការណ៍ទូលំទូលាយមួយស្ដីពីបំណងនេះ។ ក្រុមមេដឹកនាំទាំងនោះបាននិយាយថា សកម្មភាពក្អេងក្អាងកាន់តែខ្លាំងឡើងរបស់ប្រទេសចិន ក្នុងការកសាងឃ្លាំងអាវុធនុយក្លេអ៊ែររួមជាមួយសមត្ថភាពអវកាស និងសង្គ្រាមតាមអ៊ីនធឺណិតបានគំរាមកំហែងដល់សណ្ដាប់ធ្នាប់អន្តរជាតិ។ អគ្គលេខាធិការអង្គការ NATO លោក Jens Stoltenberg បាននិយាយថា សម្ព័ន្ធមិត្តនឹងស្វះស្វែងធ្វើកិច្ចសហប្រតិបត្តិការ ជាមួយប្រទេសចិនលើបញ្ហាសកល ដូចជាការប្រែប្រួលអាកាសធាតុដូចដែលរដ្ឋធានីអឺរ៉ុបចង់បាន។
លោកបានព្រមានថា ប៉ុន្តែដោយផ្ដោតទៅលើការព្រួយបារម្ភកាន់តែខ្លាំង របស់ទីក្រុងវ៉ាស៊ីនតោន ''ឥទ្ធិពលកាន់តែខ្លាំងឡើងរបស់ចិន និងគោលនយោបាយអន្តរជាតិបង្ហាញពីបញ្ហាប្រឈមដល់សន្តិសុខសម្ព័ន្ធមិត្ត''។ បណ្ដាមេដឹកនាំបានឯកភាពថា យើងត្រូវដោះស្រាយបញ្ហាប្រឈមទាំងនេះរួមគ្នាក្នុងនាមជាសម្ព័ន្ធមិត្ត ហើយយើងចាំបាច់ត្រូវចូលរួមជាមួយចិន ដើម្បីការពារផលប្រយោជន៍សន្តិសុខរបស់យើង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
