បេក្ខជនប្រធានាធិបតីអាមេរិក លោក Ron DeSantis បានប៉ះទង្គិចជាមួយអភិបាលរដ្ឋកាលីហ្វ័រញ៉ា លោក Gavin Newsom របស់គណបក្សប្រជាធិបតេយ្យ ក្នុងការកម្មវិធីជជែកដេញដោល កាលពីថ្ងៃព្រហស្បតិ៍ (ទី៣០ ខែវិច្ឆិកា) ដែលជាការធ្វើយុទ្ធនាការពិសេសចុងក្រោយ ដើម្បីបង្ហាញទៅអ្នកបោះឆ្នោតរបស់គណបក្សសាធារណរដ្ឋថា លោកគឺជាជម្រើសដ៏ល្អបំផុត ក្នុងការទៅប្រឈមជាមួយប្រធានាធិបតី លោក Joe Biden នៅក្នុងការបោះឆ្នោតឆ្នាំក្រោយ។

ការជជែកយ៉ាងតឹងសរសៃកជាមួយលោក Newsom ដែលជាសម្ព័ន្ធមិត្តដ៏លេចធ្លោរបស់លោក Biden ដែលត្រូវបានគេរំពឹងយ៉ាងទូលំទូលាយថា នឹងបន្តព្យាយាមស្វែករកតំណែងនៅសេតវិមាននោះ បានប្រែទៅជាការជេរប្រមាថគ្នាយ៉ាងឆាប់រហ័ស។

លោក DeSantis ម្ដងហើយម្ដងទៀត បានហៅលោក Newsom ថា ជាជននិយាយកុហក ដោយបរាជ័យ ក្នុងការគ្រប់គ្រងរដ្ឋ ខណៈដែលលោក Newsom បានចំអកឲ្យសមភាគីរដ្ឋផ្លរីដារបស់លោកថា ជាបុគ្គលចូលចិត្តសម្លុតអ្នកដទៃ ដែលមានសំឡេងគាំទ្រនៅដាច់ឆ្ងាយពីក្រោយគូប្រជែងតំណែងប្រធានាធិបតីរបស់គណបក្សសាធារណរដ្ឋ គឺលោក Donald Trump នៅក្នុងការស្ទង់មតិប្រធានាធិបតី។

លោក DeSantis ធ្លាប់ត្រូវបានគេមើលឃើញថា ជាគូប្រជែងដ៏គួរឲ្យចាប់អារម្មណ៍បំផុតរបស់លោក Trump ប៉ុន្តែឥឡូវនេះ តាមពីក្រោយលោក Trump ក្នុងការប្រជែង ដើម្បីទទួលបានការតែងតាំងតំណែងអ្នកអង្គុយកៅអីសេតវិមានរបស់គណបក្សសាធារណរដ្ឋ ដោយចាញ់ជាង ៤០ពិន្ទុ ហើយបានឃើញថា អ្នកគាំទ្រ និងប្រព័ន្ធផ្សព្វផ្សាយ បង្វែរចំណាប់អារម្មណ៍ទៅកាន់លោកស្រី Nikki Haley វិញ៕