កងទ័ពអ៊ីស្រាអែល បាននិយាយនៅថ្ងៃសុក្រនេះថា ដោយមានការចាប់ផ្តើមនៃការប្រយុទ្ធគ្នាឡើងវិញ ខ្លួនបានបោះពុម្ពផ្សាយផែនទី ដើម្បីណែនាំដល់ប្រជាជនតំបន់ហ្កាហ្សាអំពីតំបន់សុវត្ថិភាពសម្រាប់ការជម្លៀសរបស់ពួកគេ។

សេចក្តីថ្លែងការណ៍របស់ខ្លួន ត្រូវបានភ្ជាប់ទៅគេហទំព័រកងទ័ពអ៊ីស្រាអែលជាភាសាអារ៉ាប់ ដែលបង្ហាញពីផែនទីតំបន់ជម្លៀស។ សេចក្តីថ្លែងការណ៍ បាននិយាយទៀតថា វីដេអូជាភាសាអារ៉ាប់ ត្រូវបានចេញផ្សាយនៅលើបណ្តាញសង្គម ហើយផែនទីនេះ កំពុងត្រូវបានចែកចាយដោយកងទ័ព នៅក្នុងតំបន់ហ្កាហ្សា។

សេចក្តីថ្លែងការណ៍បានឲ្យដឹងទៀតថា៖«នេះបែងចែកទឹកដីនៃតំបន់ហ្កាហ្សាស្ទ្រីប ទៅជាតំបន់យោងទៅតាមតំបន់ដែលអាចស្គាល់បាន ដើម្បីឲ្យអ្នកស្រុកហ្កាហ្សា តម្រង់ទិសខ្លួនឯង និងយល់ពីការណែនាំ និងដើម្បីជម្លៀសចេញពីកន្លែងជាក់លាក់ ដើម្បីសុវត្ថិភាពរបស់ពួកគេ ប្រសិនបើចាំបាច់»។

កាលពីថ្ងៃព្រហស្បតិ៍ រដ្ឋមន្ត្រីការបរទេសអាមេរិក លោកអង់តូនី ប្ល៊ីនខិន( Antony Blinken) ក្នុងដំណើរទស្សនកិច្ចលើកទីបីរបស់លោក ទៅកាន់មជ្ឈិមបូព៌ា ចាប់តាំងពីសង្គ្រាម បានចាប់ផ្តើម នៅថ្ងៃទី៧ ខែតុលា បានប្រាប់លោកនាយករដ្ឋមន្ត្រី បេនចាមីន ណេតានីយ៉ាហ៊ូ ( Benjamin Netanyahu) ថា យុទ្ធនាការរបស់អ៊ីស្រាអែល នៅតំបន់ហ្កាហ្សាភាគខាងត្បូង មិនត្រូវកើតឡើងម្តងទៀតនូវការបាត់បង់ជីវិតជនស៊ីវិល និងការផ្លាស់ទីលំនៅដ៏ច្រើន ដូចដែលឃើញក្នុងអំឡុងពេលវាយលុករបស់ខ្លួន នៅភាគខាងជើងនោះ។