ក្រសួងការពារជាតិរបស់ទីក្រុងសេអ៊ូល បាននិយាយថា ប្រទេសកូរ៉េខាងត្បូងនឹងបាញ់បង្ហោះផ្កាយរណបចារកម្មយោធាដំបូងរបស់ខ្លួន នៅព្រឹកថ្ងៃសៅរ៍ (ទី២ ខែធ្នូ) តាមរយៈយានចម្លងរបស់ក្រុមអវកាស SpaceX ដោយបានបង្កើនការប្រណាំងប្រជែងផ្នែកអវកាស នៅឧបទ្វីបកូរ៉េ បន្ទាប់ពីទីក្រុងព្យុងយ៉ាង បានបាញ់បង្ហោះការតាមមើលផ្នែកយោធាលើកដំបូងរបស់ខ្លួនទៅកាន់លម្ហអាកាស កាលពីខែមុន។

យានចម្លង Falcon 9 របស់ក្រុមហ៊ុនអវកាស Space X ត្រូវបានដំឡើងបញ្ឈរនៅលើជើងទម្របាញ់បង្ហោះនៅមូលដ្ឋាននេះ ខណៈត្រូវបានឃើញនៅក្នុងរូបថត ដែលបានចេញផ្សាយនៅលើគេហទំព័ររបស់ក្រុមហ៊ុនអវកាសរបស់សហរដ្ឋអាមេរិកមួយនេះ។ ការបាញ់បង្ហោះដំបូងឡើយ ត្រូវបានគ្រោងទុកនៅថ្ងៃទី៣០ ខែវិច្ឆិកា ប៉ុន្តែត្រូវបានពន្យារពេល ២ថ្ងៃ ដោយសារអាកាសធាតុមិនអំណោយផល។

ប្រសិនបើផ្កាយរណបនេះត្រូវបានដាក់ចូលគន្លងតារាវិថីដោយជោគជ័យ គេរំពឹងថា ផ្ដាយរណបនេះនឹងទាក់ទងជាមួយស្ថានីយ៍នៅភពផែនដី នាពេលក្រោយ។ ដោយចាប់ផ្តើមពីផ្កាយរណបអេឡិចត្រូអុបទិក និងប្រព័ន្ធអ៊ីនហ្វ្រារ៉េដ កូរ៉េខាងត្បូងគ្រោងនឹងបាញ់បង្ហោះផ្កាយរណបរ៉ាដាសំយោគចំនួន៤ បន្ថែមទៀត នៅឆ្នាំ២០២៥ ដើម្បីតាមដានកូរ៉េខាងជើងឲ្យកាន់តែមានភាពច្បាស់លាស់ឡើងៗ។

ការបាញ់បង្ហោះខាងមុខនេះ កើតឡើងបន្ទាប់ពីកូរ៉េខាងជើង បានដាក់ផ្កាយរណបចារកម្មដំបូងរបស់ខ្លួននៅក្នុងគន្លងតារាវិថីកាលពីថ្ងៃទី២១ ខែវិច្ឆិកា បន្ទាប់ពីបរាជ័យ ក្នុងការប៉ុនប៉ង ២លើកដំបូង កាលពីដើមឆ្នាំនេះ៕