​អ៊ីស្រាអែល៖ ប្រភព​មួយ​ស្និទ្ធ​នឹង​លោក Bennett បាន​និយាយ​ថា ​នៅ​ថ្ងៃ​ដំបូង​របស់​លោក​ក្នុងនាម​ជា​នាយករដ្ឋមន្ត្រី​កាលពី​ថ្ងៃ​ចន្ទ​ លោក Naftali Bennett មិន​ត្រូវ​បាន​ទទួល​ការ​រាក់ទាក់​ពី​សំណាក់ លោក Benjamin Netanyahu ដែល​ជា​អ្នក​កាន់​តំណែង​មុន​របស់​លោក​ទេ ដោយ​ផ្តល់​ពេល​ឱ្យ​លោក​ត្រឹមតែ ២៥​នាទី​ប៉ុណ្ណោះ​នៅ​ក្នុង​កិច្ចប្រជុំ​ផ្ទេរ​អំណាច​របស់​លោក​ទាំង​២ ​នៅ​ការិយាល័យ​នាយករដ្ឋមន្ត្រី​។

​ប្រភព​ដដែល​បាន​និយាយ​ថា មេដឹកនាំ​ទាំង​២​ បាន​ដោះស្រាយ​បញ្ហា​សន្តិសុខ និង​ការទូត​ដែល​ក្រោយ​មក​ត្រូវ​បាន​បំពេញ​បន្ថែម​ដោយ​ការប្រជុំ​របស់​លោក Bennett ជាមួយ​ទីប្រឹក្សា​សន្តិសុខ​ជាតិគឺលោក Meir Ben-Shabbat។​ ប្រភព​បាន​និយាយ​ថា​ ទេ​លោក​មិន​ខឹង​ទេ​ ​បំភ្លេច​ចោល​ទៅ​ ដល់​ពេល​ត្រូវ​បន្ត​ដំណើរ​ទៅមុខ​ហើយ​។​ លោក Netanyahu បាន​បដិសេធ​មិន​ចូលរួម​ក្នុង​ពិធី​ផ្ទេរ​អំណាច​តាម​ប្រពៃណី​ ហើយ​កិច្ចប្រជុំ​ខ្លី​បាន​ធ្វើឡើង​នៅ​ក្រោយ​ជំនួប​បិទទ្វារ​។មិន​មាន​កិច្ចប្រជុំ​បន្ថែម​ទៀត​ត្រូវ​បាន​គ្រោងទុក​រវាង លោក Netanyahu និងលោក Bennett នោះ​ទេ។​ ប្រភព​ជិតស្និទ្ធ​នឹង​លោក Bennett បាន​និយាយ​ថា ​លោក Netanyahu មិន​អនុញ្ញាត​ឱ្យ​បុគ្គលិក​ណា​មួយ​របស់​លោក ​បើក​កិច្ចប្រជុំ​ផ្ទេរ​អំណាច​ឡើយ មុន​ពេល​រដ្ឋាភិបាល​ថ្មី​ត្រូវ​បាន​អនុញ្ញាត​ជា​ផ្លូវការ​កាលពី​ថ្ងៃ​អាទិត្យ​៕

អត្ថបទ៖ សុខ​មាន