ភ្ញៀវទេសចរបានបង្ហាញចំណាប់អារម្មណ៍របស់ខ្លួនថា ពួកគាត់រំភើបរីករាយមែនទែន ដែល​បាន​មកកម្សាន្តបុណ្យសមុទ្រ លើកទី១០ ជុំទី៣ នៅខេត្តកែប ព្រឹត្តិការណ៍នេះអធឹកអធម មាន​កម្ម​វិធី​កម្សា​ន្តសប្បាយច្រើន ធ្វើឲ្យប្លែកភ្នែក ប្លែកអារម្មណ៍ ហើយថា​ព្រឹត្តិការណ៍​ដ៏​សប្បាយរីករាយនេះ គឺ​កើត​ចេញ​ពីសុខសន្តិភាព ដែលសម្តេចតេជោ យកជីវិតទៅប្តូរមកឲ្យពលរដ្ឋ និងប្រទេសជាតិ ។

ទេសចរមកពីខេត្តកំពត កញ្ញា លក្ខិណា បានប្រាប់ឲ្យដឹងថា នៅរាត្រីទី២ នៃពិធីបុណ្យ​សមុទ្រ​ លើក១០ ជុំ៣ នៅខេត្តកែប ទោះមានភ្លៀងធ្លាក់ ធ្វើឲ្យខកខាន​កម្ម​វិធី​របស់​ប្រមុខ​ថ្នាក់​ដឹកនាំ​ក៏​ពិត​មែន ប៉ុន្តែក្រោយពេលរាំងភ្លៀង កម្មវិធីកម្សាន្តសប្បាយនៅតែបន្ត ហើយភ្ញៀវ​ទេសចរ​ក៏​បាន​មក​ចូល​រួម​កា​ន់តែច្រើន ប្រកបដោយទឹកមុខសប្បាយរីករាយ ។ កញ្ញាផ្ទាល់យល់ឃើញថា បុណ្យ​សមុទ្រ​ឆ្នាំ​នេះមា​នកម្មវិធីប្លែកគួរឲ្យទាក់ទាញច្រើន ពិសេសកន្លែងដើរលេងនៅខេត្តកែបតែម្តង ។

ចំណែកលោកតាកឿន មកពីស្រុកឈូកខេត្តកំពត បានបង្ហាញចំណាប់អារម្មណ៍ដែរថា នេះជា​លើក​ទីមួយ​ហើយក្នុងឆាកជីវិតរបស់លោកតា ដែលបានមកដើរកម្សាន្តក្នុងពិធីបុណ្យសមុទ្រ។ ការ​រៀប​ចំបានល្អ មានកម្មវិធីកម្សាន្តសប្បាយច្រើនគក្រឹកគគ្រេង ខុសពីជំនាន់លោកតា ពេល​ធំ​ដឹង​ក្តី​ឡើង​ជួបតែសង្គ្រាម។ ប៉ុន្តែបន្ទាប់ពីមានសុខសន្តិភាព ប្រទេសរីកចម្រើន ហើយ​ព្រឹត្តិការណ៍​កម្សាន្ត​សប្បាយជាច្រើនត្រូវបានបង្កើតឡើងដើម្បីទាក់ទាញទេសចរជាតិ និងអន្តរជាតិ ជាក់ស្តែង​ដូច​ពិធី​បុណ្យសមុទ្រនេះពិតជាគួរឲ្យរីករាយណាស់។

តាមរបាយការណ៍របស់ប្រធានមន្ទីរទេសចរណ៍ខេត្តកែប លោក សោម ចិន្តា បានឲ្យដឹងថា ថ្ងៃទី១ នៃ​ពិធីបុណ្យសមុទ្រមានពលរដ្ឋ និងទេសចរជាតិអន្តរជាតិ ចូលរួមកម្សាន្តសប្បាយ ជាង ៤ម៉ឺន​នាក់ ចំណែកនៅថ្ងៃទី២ មានចំនួនជាង១២ម៉ឺននាក់ ហើយស្ថា​ន​ភាព​ទូទៅ​មាន​លក្ខណៈ​ល្អ​ប្រសើរលើកលែងតែបញ្ហាអាកាសធាតុ ដោយសារល្ងាចថ្ងៃទី២ មានភ្លៀង​ធ្លាក់​ធ្វើ​ឲ្យខ​ក​ខាន​ដល់​កម្ម​វិធី​របស់​ប្រមុខថ្នាក់ដឹកនាំ៕